राष्ट्रियसभा सदस्य निर्वाचनका मतदाताहरूको नामावली निर्वाचन आयोगले आइतबार प्रकाशित गर्ने भएको छ ।
आयोगले प्रदेश सांसद्को शपथपछि मतदाता नामावली सार्वजनिक गर्ने बताएको छ।
आइतबार सातवटै प्रदेशका ५५० प्रदेश सांसदहरुले शपथ लिँदैछन् । शपथ ग्रहणसकिएपछि नामावली प्रकाशित हुने निर्वाचन आयोगका प्रवक्ता नवराज ढकालले जानकारी दिए ।
राष्ट्रियसभा चुनावका लागि प्रदेशसभाका सांसद् र स्थानीय तहका प्रमुख र उपप्रमुख मतदाता हुने व्यवस्था छ ।
कुल ५९ सदस्यीय राष्ट्रियसभाका लागि प्रत्येक प्रदेशबाट ८-८ जना चुनावबाट निर्वाचित हुनेछन् भने ३ जना सरकारको सिफारिसमा राष्ट्रपतिले मनोनित गर्ने संवैधानिक व्यवस्था छ ।
यही माघ २४ गते राष्ट्रियसभा सदस्य निर्वाचनको मिति तय भएको छ।
