दीपक गिरीले गरे कांग्रेस केन्द्रीय समिति बहिष्कार

सेतोपाटी संवाददाता

काठमाडौं, माघ ४

नेपाली कांग्रेसका केन्द्रीय सदस्य दीपक गिरीले ५ नम्बर प्रदेशको राजधानीको विषयमा असन्तुष्टि जनाउँदै आफ्नो पार्टीको केन्द्रीय समिति बैठक बहिष्कार गरेका छन्।

राष्ट्रिय सभा चुनावमा अन्य पार्टीसँगको सहकार्य, उम्मेदवार तथा प्रतिनिधिसभा चुनावको समिक्षा लगायतका विषयमा छलफल गर्न प्रधानमन्त्री निवास बालुवाटारमा अहिले नेपाली कांग्रेस केन्द्रीय समितिको बैठक बसिरहेको छ।

उक्त बैठकमा गिरीले ५ नम्बर प्रदेशको राजधानी रातारात बुटवल तोकेको भन्दै प्रधानमन्त्रीसँग आक्रोश पोखेका थिए।

‘अहिलेसम्म प्रदेश ५ को राजधानी दाङ नै हुने भनेर उच्च अदालत त्यहिँ बन्या हो, राष्ट्रिय सभाको निर्वाचनस्थल पनि त्यहिँ भयो। प्रधानमन्त्रीले पनि दाङलाई विशेष स्थान भनेर भाषण गर्दै आउनुभएको थियो तर रातारात के ‘कन्सपिरेसि’ भयो र बुटवललाई राजधानी तोकियो? भनेर मैले प्रश्न गरेको हुँ,’ उनले सेतोपाटीसँग भने, 'यति भनेर मैले केन्द्रीय समिति बैठक बहिष्कार गरेको हुँ।’

प्रधानमन्त्री शेरबहादुर देउवाले भने अहिले राजधानी तोकिएको हैन अस्थायी मुकाम मात्र हो भनेर बैठकमा स्पष्ट पारेका थिए।

प्रकाशित मिति: बिहीबार, माघ ४, २०७४ ०२:४५

सिफारिस

ऊर्जा सुरक्षामा कस्तो छ नेपालको अवस्था?