प्रदेश प्रमुखमा कांग्रेस र मधेसवादी दलको भागबन्डा

फाइल तस्बिर।


सरकारले बुधबार प्रदेश प्रमुख नियुक्तिको तयारी गरेको छ।

मंगलबार प्रदेशको अस्थायी मुकाम र प्रदेश प्रमुखबारे निर्णय गर्न मन्त्रिपरिषद् बैठक डाकिएको भए पनि थप छलफल गर्नु पर्ने भन्दै स्थगित गरिएको थियो।

प्रधानमन्त्री निवास बालुवाटार स्रोतका अनुसार बुधबार बिहान ९ बजे बस्ने बैठकले प्रदेश प्रमुख र अस्थायी मुकाम तोक्ने छ।

प्रधानमन्त्री शेरबहादुर देउवाले राष्ट्रिय पार्टी बनेका पाँच वटै दलको सहमतिमा प्रदेश प्रमुख नियुक्तिको प्रयास गरेका थिए। उनले कांग्रेस, एमाले र माओवादीलाई २–२ र संघीय समाजवादी फोरम र राष्ट्रिय जनता पार्टीको सिफारिशमा एक प्रदेशमा प्रमुख नियुक्ति गर्ने प्रस्ताव गरेका थिए।

तर गठबन्धन बनाएका एमाले र माओवादी प्रधानमन्त्रीको सो प्रस्तावमा सहमत नभएपछि कांग्रेसबाट पाँच, राजपा र फोरमबाट २ प्रदेशमा प्रमुख नियुक्त गर्ने सरकारको तयारी छ।

भोलिकै मन्त्रिपरिषद् बैठकले प्रदेश सभाको पहिलो बैठक बस्ने अस्थायी मुकाम पनि तोक्ने छ।

स्रोतका अनुसार विराटनगर, जनकपुर, ललितपुर, पोखरा, भैरहवा/बुटवल, सुर्खेत र धनगढीमा पहिलो बैठक बस्ने गरी प्रदेशको अस्थायी मुकाम तोक्ने सरकारको तयारी छ।

Share:

© 2017 Setopati Sanchar Pvt. Ltd.