म्याग्दी महोत्सवको उद्घाटन दाहालले गर्ने

म्याग्दी महोत्सवका प्रमुख अतिथी: विकासप्रति आशाबादी म्याग्देली


भनिन्छ ‘एउटा युगले एकजना मात्र नायक जन्माउँछ ।’ २०४६ सालमा भएको ऐतिहाँसिक जनआन्दोलन पछि २०५२ सालसम्मको समयावधिलाई मौन मान्ने हो भने त्यसपछिको नेपाली युगका नायक पुष्पकमल दाहाल ‘प्रचण्ड’ हुन् भन्दा कुनै अत्युक्ति हुँदैन ।

२०५२ सालमा तत्कालिन नेकपा माओवादीले शुरु गरेको सशस्त्र जनयुद्धको गर्भबाट शक्तिशाली योद्धाका रुपमा जन्मिएका प्रचण्ड २०५२ सालदेखि अहिलेसम्म पनि नेपालको राजनीतिका निर्णायक र शक्तिशाली नेताको रुपमा चिनिएका छन् । एक अर्थमा नेपालको राजनीति नेकपा माओवादी केन्द्रका अध्यक्ष पुष्पकमल दाहाल (प्रचण्ड) को नेरोफेरोमा नै घुमिरहेको छ ।

प्रचण्ड र म्याग्दीको सम्वन्ध ध्वस्त र निर्माणको ‘मजधार’ बाट अघि बढिरहेको छ । २०६० साल चैत्र ७ गते तत्कालिन नेकपा (माओवादी) ले बेनी आक्रमण गरेपछि त्यसको जस वा अपजस पार्टीको नेतृत्वकर्ता भएको हिसावले स्वभाविकरुपमा प्रचण्डमाथि आइपर्छ । यी तिनै प्रचण्ड हुन् जसले नेतृत्व गरेको पार्टीका लडाकुहरुले बेनी आक्रमण गरेका थिए । सयौं मानिसहरु मरेका थिए त्यो आक्रमणमा । कैयौं अंगभंग भएका थिए । अर्वौको क्षति भएको थियो ।

भौतिक पूर्वाधारहरु जलाइएको थियो,भत्काइएको थियो । सयौं मानिसहरु अनाथ र टुहुरा बनेका थिए । मानिसहरुले त्यतिबेला प्रचण्डलाई नकारात्मक रुपमा बुझेका थिए । दुत्कारेका थिए । त्यो स्वभाविक पनि थियो । किनभने त्यतिबेला प्रचण्ड युद्धको नायिके थिए । जनयुद्धको नेतृत्व गरेका थिए । त्यतिवेला प्रचण्डको क्रुरता मात्र जनतालाई थाहा थियो । उनको शालिनता र भद्रतालाई जनताले देख्न,बुझ्न र महशुस गर्न पाएका थिएनन् ।

तर, अहिले समय फेरिएको छ । नेकपा माओवादी शान्ति प्रक्रियामा आइसकेपछि जनता माओवादीसंग त्रसित होइन आशावादी बन्न थालेका थिए । प्रचण्डको ओझ र व्यक्तित्वले जनतालाई आकर्षित गरेको थियो र छ पनि । तिनै प्रचण्ड भोलीबाट शुरु हुने छैटौं म्याग्दी महोत्सवको प्रमुख अतिथी बनेर म्याग्दीमा आउँदैछन् । प्रचण्डको म्याग्दी आगमनलाई म्याग्देलीहरुले प्रतिक्षा गरिरहेका छन् र उनको भव्य स्वागतका लागि जुटेका छन् ।

प्रचण्डको नेतृत्व (पार्टीगत रुपमा) मा आक्रमण गरी ध्वस्त बनेको बेनी बजारका भौतिक संरचनाहरुको पुनःनिर्माण भैसकेको छ । भव्य भवनहरु ठडिएका छन् । पुल बनेका छन् । युद्धमा विनाश भएका संरचनाहरुको पुनः निर्माण भएपनि म्याग्दीमा रहेका प्राकृतिक स्रोत र सम्पदाहरुको सही रुपमा प्रयोग हुन सकेको छैन । विकासका पूर्वाधारहरु जिल्लाका सबै ठाउँमा पुग्न सकेका छैनन् ।

पहिलो म्याग्दी महोत्सव २०६० को दुई महिना पछि माओवादीले म्याग्दी आक्रमण गरेर ध्वस्त बनाएको सदरमुकाम बेनी बजार अहिले अत्यन्त सुन्दर बजार बनेको छ । उद्योग,व्यापार,व्यवयास फस्टाएको छ । उद्योगी, व्यापारीहरुको साझासंस्था म्याग्दी उद्योग वाणिज्य संघको मूल आयोजना रहेको छैटौं म्याग्दी महोत्सवको उद्घाटन गर्न पुष्पकमल दाहाल (प्रचण्ड) भोलि बेनीमा आउँदैछन् ।

प्रचण्डसँग म्याग्देलीको अपेक्षा

प्रचण्डसँग म्याग्देली जनताले धेरै अपेक्षा गरेका छन् । प्रचण्ड नेतृत्वको सरकार हुँदा म्याग्दीको विकासका लागि परेका योजनाहरु म्याग्देली जनताले विर्सेका छैनन् । आक्रमणका बेला ध्वस्त बनाइएका संरचनाहरु निर्माण भएपनि अझ धेरै विकासका पूर्वाधारहरु म्याग्दीलाई चाहिएको छ । पर्यटन विकासका प्रशस्त योजनाहरुको आवश्यकता छ ।

मुलुकमा नयाँ शिराको राजनीति शुरु हुँदै छ । स्थानीय तह,प्रतिनिधि सभा र प्रदेशसभाको निर्वाचन पछि मुलुक नयाँ गन्तव्यको यात्रामा अघि बढेको छ । त्यो यात्रा भनेको समृद्धिको यात्रा हो । म्याग्दीको समृद्धिका लागि पुष्पकमल दाहा (प्रचण्ड)को भूमिका महत्वपूर्ण हुने विश्वास म्याग्देली जनताको छ । म्याग्देली जनताले जिल्लाको विकास र समृद्धिका लागि प्रचण्डको भूमिका महत्वपूर्ण हुने विश्वास गर्नुमा धेरै आधारहरु रहेका छन् । ती आधारहरु मध्येको प्रमुख आधार भनेको वामएकता र त्यसपछि देश नेतृत्व तहमा रहने प्रचण्डको भूमिका नै प्रमुख आधार हो ।

करिब आधा दशकअघि आफ्नै नेतृत्वको पार्टीले आक्रमण गरी ध्वस्त बनाएको ठाउँमा आएको बेला प्रचण्डले पक्कै पनि केही विकासका योजनाहरु पूरा गर्ने प्रतिवद्धता म्याग्देली जनतासंग अवश्य गर्नेछन् । यस जिल्लाको विकास र समृद्धिको लागि आफ्नो पूरापूरा सहयोग रहने प्रतिवद्धता व्यक्त गर्नेछन् । उनले व्यक्त गर्ने प्रतिवद्धताहरु पूरा गर्न सके भने म्याग्दीको समृद्धि धेरै टाढाको विषय हुनेछैन । उनले म्याग्दीको विकासका लागि केही ठोस कामहरु गर्ने वचनवद्धता व्यक्त गर्दै सरकार गठनभएपछि ती प्रतिवद्धताहरु पूरा गरुन् म्याग्देली जनताले प्रचण्डसंग यही अपेक्षा गरेका छन् । प्रचण्डले म्याग्देली जनताका अपेक्षालाई पूरा गर्नसके भने मात्र उनको प्रमुख आतिथ्यताको अर्थ रहने छ । छैटौं म्याग्दी महोत्सव म्याग्दीको विकास र समृद्धिका लागि कोशे ढुङ्गा सावित हुने छ ।

Share:

© 2017 Setopati Sanchar Pvt. Ltd.