बालुवाटार बैठकमा ओली अनुपस्थित


प्रधानमन्त्री शेरबहादुर देउवाले बोलाएको सर्वदलीय बैठकमा एमाले अध्यक्ष केपी शर्मा ओली अनुपस्थित भएका छन्।

दलहरुबीच सहमति गरेर प्रदेश प्रमुख तोक्नेबारे छलफल गर्न प्रधानमन्त्री देउवाले राष्ट्रिय पार्टी बनेका पाँच दलका शीर्ष नेताको बैठक बोलाएका हुन्।

केहीबेरअघि सुरु भएको बैठकमा माओवादी केन्द्रका अध्यक्ष पुष्पकमल दाहालसहित नारायणकाजी श्रेष्ठ र रामबहादुर थापा सहभागी छन्।

कांग्रेसबाट प्रधानमन्त्री देउवासहित नेताहरु रामचन्द्र पौडेल र कृष्णप्रसाद सिटौला बैठकमा उपस्थित छन्।

एमालेबाट पूर्वसभामुख सुवास नेम्वाङ, उपाध्यक्ष भीम रावल र पूर्वमन्त्री विष्णु पौडेल र अग्नी खरेल सहभागी छन्।

बैठकमा राजपा अध्यक्ष मण्डलका महन्थ ठाकुर, अनिल झा, महिन्द्र राय यादव, राजकिशोर यादव सहभागी छन्।

त्यस्तै फोरमबाट राजेन्द्र श्रेष्ठ लगायत नेता बैठकमा छन्।

एमाले अध्यक्ष ओली केही दिनयता बिरामी छन्। उनलाई  झाडापखालाका लागेको थियो। उनी अहिले बालकोट निवासमा आराम गरिरहेका छन्।  ओली  स्वास्थ्यका कारण बैठकमा सहभागी  नभएका हुन् भन्ने प्रश्नमा उनका प्रेस संयोजक चेतन अधिकारीले भने- होइन, उहाँ स्वास्थ्य अहिले ठिक छ। अरू राजनीतिक भेटघाट गरिरहनुभएको छ।

 

Share:

© 2017 Setopati Sanchar Pvt. Ltd.