सरकारले न्यायालयलाई थप सुदृढ बनाउन ध्यान दिनुपर्छः प्रधानन्यायाधीश

बिहिबार महान्यायाधिवक्ताको कार्यालय स्थापना दिवसको अवसर पारेर काठमाडौंमा आयोजित एक कार्यक्रममा सहभागी हुँदै प्रधानन्यायाधीश गोपालप्रसाद पराजुलीलगायत।तस्बिर:नारायण महर्जन/सेतोपाटी


प्रधानन्यायाधीश गोपालप्रसाद पराजुलीले न्यायालयलाई सधैँ संक्रमणकालीन अवस्थामा राख्न नसकिने हुँदा अब बन्ने सरकारले न्यायालयलाई थप सुदृढ बनाउन ध्यान दिने विश्वास व्यक्त गरेका छन्।

महान्यायाधिवक्ताको कार्यालयको ६७ औँ स्थापना दिवसका अवसरमा कार्यालयद्वारा आज यहाँ आयोजित कार्यक्रमलाई सम्बोधन गर्दै प्रधानन्यायाधीश पराजुलीले न्यायालयप्रति रहेको जनविश्वासलाई अझ बलियो बनाउन सामूहिक प्रयत्नको खाँचो औँल्याएका हुन्।

उनले भने, “न्यायालय भनेको कसैद्वारा कसैका लागि नियुक्ति र जागिर खुवाउन सिर्जना भएको ठाउँ होइन, यसका आफ्नै मूल्य, मान्यता छन्, मेरो प्रयास अभिछिन्न रूपमा मूल्य मान्यताअनुरूप न्यायालय सञ्चालन गर्नमा ध्यान गएको छ ।”

उनले सातवटा प्रदेशमा सातवटा उच्च अदालतले न्याय सम्पादन हुनसक्ने चर्चा गर्दै न्यायापालिकाका सेवालाई चुस्त बनाउन सूचना प्रविधिको अधिकतम् उपयोग शुरू गरिएको जानकारी दिए। प्रधानन्यायाधीश पराजुलीले न्यायालयको भौतिक प्रशासनिक सेवालाई अझ सुदृढ बनाउन यथेष्ट बजेट विनियोजन गर्न माग गर्दै न्यायालयमा बजेट विनियोजन गर्न कन्जुस्याइँ गरिनु नहुने बताए।

सो अवसरमा उनले पूर्वमहान्यायाधिवक्ता रमनकुमार श्रेष्ठलाई सम्मान र उत्कृष्ट सरकारी वकिल तथा कर्मचारीलाई पुरस्कृत गरे। विसं २००८ मा आजकै दिन महान्यायाधिवक्ताको कार्यालयको स्थापना भएको थियो।

कानून, न्याय तथा संसदीय मामिलामन्त्री यज्ञबहादुर थापाले फौज्दारी न्याय प्रणालीलाई सुदृढ बनाई चुस्त न्याय सेवा प्रदान गर्न सरकारी वकिलको भूमिका अहम् रहने चर्चा गरे। उनले संविधानले महान्यायाधिवक्ताको कार्यालयलाई प्रदान गरेका जिम्मेवारी धेरै रहेको चर्चा गर्दै जिम्मेवारी पूरा गर्न कार्यालयलाई सरकारले सहयोग गर्ने जानकारी दिए।

सोही अवसरमा प्रहरी महानिरीक्षक प्रकाश अर्यालले फौज्दारी न्याय प्रणालीप्रति थप जनविश्वास बढाउन प्रहरी र सरकारी वकिलबीचको समन्वय अझ बलियो बनाउनुपर्ने बताए।

पूर्वमहान्यायाधिवक्ता श्रेष्ठले महान्यायाधिवक्ताको सेवालाई बलियो बनाउन आर्थिक लगानी बढाउनुपर्ने बताए। संवैधानिक कानूनका विज्ञ सूर्यप्रसाद शर्मा ढुङ्गेल र पूर्व महान्यायाधिवक्ता प्राडा युवराज संग्रौलाले महान्यायाधिवक्ता र सरकारी वकिलको भूमिकाको बारेमा चर्चा गरेका थिए।

Share:

© 2017 Setopati Sanchar Pvt. Ltd.