चितवनको कालीखोलामा गएको पहिरो पन्छाएर मुग्लिन फर्कदै गरेको प्रहरी गाडी अर्को स्थानमा आएको पहिराले बगाउँदा एक असइसहित २ जना प्रहरीको मृत्यु भएको छ।
रातको १ बजे पहिरो पन्छाएर फर्कदै गरेको प्रहरीको स्कारपियो गाडी पहिरोले बगाएर त्रिशुली बदीमा पुर्याएको थियो। इलाका प्रहरी कार्यालय मुग्लिनका असइ निश्चल तामाङ र प्रहरी जवान दीप कुमार मास्केका शव निकालिएको चितवनका एसपी दीपक थापाले जानकारी दिए।
२ जना प्रहरी जवान र सय राउण्ड गोलीसहित २ नाल बन्दुक हराएको छ । प्रहरी जवान सन्दीप कार्की र लिलबहादुर चेपाङ्ग बेपत्ता भएका छन् ।
वेपत्ताहरुको खोजीकार्य विहानैबाट सुरु भएको छ। त्यस्तै सोही बेला पहिरोले ना ५ ख ७८२७ नम्बरको ट्रक पहिरोले पर्दा चालक र सहचालक घाइते भएका छन्।
