ललितपुरका लिजेन शाक्य एक वर्षअघिसम्म 'इयरबड' बेच्थे। चिनियाँ ब्रान्डका इयरबड किनेर अनलाइनमार्फत बिक्री गर्थे। व्यापार राम्रै थियो।
यसरी सामान किनबेच गरिरहे पनि उनी सन्तुष्ट थिएनन्। आफ्नै सिर्जनामा आफ्नै ब्रान्डको केही फरक व्यवसाय गर्न चाहन्थे। के गर्ने भन्ने चाहिँ टुंगो लाग्न सकेको थिएन।
करिब एक वर्षअघि उनले निधो गरे — आफै ब्याग उत्पादन गर्ने र त्यसको नेपाली ब्रान्ड बनाउने।
'ब्यागका विभिन्न डिजाइनबारे सोचिरहेको थिएँ तर अलमल भइरहेको थियो। मनैदखि नै यही काम गर्छु भन्ने लागेपछि इयरबडको व्यापार छाडेर ब्यागतिर आएँ,' लिजेनले भने, 'ब्याग हरेक मानिसका लागि आवश्यक हुन्छ। यसमा राम्रो सम्भावना देखेर काम सुरू गरेको हुँ।'
आफ्नो ब्रान्ड बनाउने हुटहुटी भए पनि उनीसँग कामको आइडिया थिएन। ब्याग बनाउने कच्चा पदार्थ कहाँ पाइन्छ, कहाँ लगेर सिउने, यसको प्रक्रिया कस्तो हुन्छ लगायतबारे उनले केही बुझेका थिएनन्। ठूलो लगानी गर्ने पैसा पनि थिएन।
त्यसैले उनी काठमाडौं उपत्यकामा ब्याग सिउने कारखाना खेज्दै हिँडे। सात वटा कारखाना पुगे। सिलाइबारे कुरा गरे, केही आइडिया पनि लिए।
ब्याग बनाउने प्रशोधित वस्तु र अन्य आवश्यक सामग्री पाइने ठाउँबारे कारखानाबाटै जानकारी पाए। लेदर, फेब्रिक, चेन लगायत आवश्यक सामग्री पाइने र सिलाउने ठाउँ पक्का भयो।
अनि उनले ब्रान्ड नाम राखे 'प्याकब्याग'।
यसपछि सुरू भयो डिजाइनको काम। सुरूमा केही डिजाइन तयार गरेर तिनै नमूना कारखानामा सिउन लगाए। करिब दुई महिनामा आफ्नो डिजाइनको सिलिङ ब्याग (साइड ब्याग) तयार भयो।
यो सन् २०२४ मार्चको कुरा हो।
उनले आफ्नो ब्रान्ड प्याकब्यागको पहिलो खेपमा १५ वटा सिलिङ ब्याग तयार गरे र अनलाइन बजारमा पुर्याए। यति काम पूरा हुँदा ५० हजार रूपैयाँ लगानी भएको थियो। उनले त्यो पैसा आफ्नै बचतबाट जुटाएका थिए।
'सिलिङ ब्याग डिजाइन गर्न निकै समय लाग्यो,' २३ वर्षीय लिजेनले भने, 'यो साइड ब्याग हो। अति आवश्यक व्यक्तिगत सामान सुरक्षित राख्ने गरी डिजाइन गरिएको छ।'
पहिलो खेपको १५ वटा ब्याग एक महिनामा बिकिसक्यो। लिजेनको हौसला बढ्यो। राम्रो डिजाइन गरेर उत्पादन बढाउन सके बजार पाइने रहेछ भन्ने विश्वास भयो।
उनले लगानी थपेर उत्पादन बढाए। दोस्रो पटक त्यही डिजाइनमा ५० वटा ब्याग बनाए। दुई हप्तामै बिक्री भयो।
'लेदर र कालो रङको फेब्रिक मिलाएर बनाइएको थियो, धेरैले रूचाए। सबै ब्याग फटाफट बिक्री भयो,' लिजेनले भने।
यसपछि उत्पादन र बिक्री अनपेक्षित ढंगले बढ्यो। हाल उनी तीन डिजाइनका ब्याग बेचिरहेका छन्; सिलिङ, क्लासिक फुल लेदर र ब्याकप्याक। यिनको मूल्य क्रमशः साढे दुई हजार, साढे तीन हजार र सात हजार रूपैयाँ छ।
ब्याकप्याक उनले भर्खरै ल्याएका हुन्। यो अरूभन्दा नयाँ र निकै आकर्षक देखिने उनी बताउँछन्। खासगरी स्कुल, कलेजका विद्यार्थी र कर्मचारीका लागि उपयुक्त छ। त्यस्तै सिलिङ ब्याग बोक्न छरितो र 'एनएफसी चिप' भएकाले युवापुस्ताले रूचाएका उनले बताए।
'एनएफसी चिप नौलो फिचर हो। ब्यागको लोगोसँगै चिप राखेका छौं। यसमा आफ्नो प्रोफाइल र अरू लिंक जोड्न मिल्छ। कस्टमाइज पनि हुन्छ,' उनले भने।
लिजेनको कम्पनी प्याकब्यागबाट मासिक कम्तीमा दुई सय वटा ब्याग उत्पादन हुँदैछ। यसमा ११ जनाले रोजगारी पाएका छन्। धेरैजसो कामदार महिला छन्। उनीहरू घरमै बसेर लेदर काट्छन् र ब्याग सिउँछन्। त्यस्तै लिजेनलाई आमाले काममा सघाउँछिन्।
हाल प्याकब्यागका ब्याग कम्पनीको आधिकारिक पेज इन्स्टाग्राम, शंखमूलका केही पसल र ठमेलस्थित को-क्रियटिभ (पसल) मा पाइन्छ। काठमाडौं उपत्यका मुख्य बजार भए पनि पोखरा, भैरहवा लगायत सहरबाट पनि अर्डर आउँछ। सामान पठाउन डेलिभरी कम्पनीसँग सहकार्य छ।
यति बेला लिजेनको ध्यान डिजाइन र गुणस्तरमा छ। डिजाइनमा विविधता र राम्रो गुणस्तरले बजारमा माग बढ्ने उनको विश्वास छ।
अहिले उनी अफिस ब्याग, जिम ब्याग र स्कुल ब्याग डिजाइनमा लागेका छन्। यी ब्याग चाँडै बजारमा ल्याउने उनको तयारी छ। त्यस्तै काठमाडौंमा पसल खोल्ने योजनामा छन्।
'जे सोचेर यो व्यवसायमा आएको थिएँ, त्योभन्दा राम्ररी चलेको छ। कामबाट खुसी छु,' हाल बिबिएस पढिरहेका लिजेनले भने, 'लगानी र उत्पादन बढाउँदै छु। भविष्यमा प्याकब्यागलाई सबैखाले डिजाइन र गुणस्तरीय ब्यागको ब्रान्ड बनाउने लक्ष्य छ।'
सम्पादकीय नोटः तपाईंसँग पनि आफ्नो 'नेपाली ब्रान्ड' को कथा छ भने हामीलाई (setopati@gmail.com) सम्पर्क गर्नुहोस्, हामी तपाईंका कथा लेख्नेछौं।
(सेतोपाटीको नेपाली ब्रान्ड स्तम्भका अन्य स्टोरीहरू पढ्न यहाँ क्लिक गर्नुहोस्)
-1742801159.jpg)
