द कन्भरसेसन– ५२
नेपालका चर्चित मोटो–भ्लगर जोडी हुन् विविद जंग थापा (एमआरबी भ्लग) र सुरक्षा केसी।
मोटरसाइकलमा टाढा–टाढासम्म, सजिलो–अप्ठ्यारो, पक्की–कच्ची बाटो डुल्दै–घुम्दै भिडिओ बनाउने र त्यसलाई युट्युब लगायत सामाजिक सञ्जालमा राखेर उनीहरूले प्रशस्तै फ्यान कमाए।
बाइक राइडिङमा सोखिन उनीहरूले यात्रामार्फत आफ्नो सोख मात्रै पूरा गरेनन्, 'मोटो–भ्लगर' को चिनारी पाए। धेरथोर आम्दानी पनि गरे। र, त्योभन्दा पनि हिमाल, पहाड र तराइको सुन्दरता र त्यहाँको अवस्थालाई मोटो–भ्लगिङमार्फत सबैलाई देखाए।
तीनै भिडिओको आकर्षणले उनीहरूको च्यानलमा लाखौं सब्सक्राइबर जोडिएका छन्। म्याग्दीका विविद जंगले मोटो–भ्लगिङ सुरू गरेको झन्डै दस वर्ष भयो। यहाँसम्म आउँदा उनी नेपालका सबभन्दा धेरै सबस्क्राइबर कमाएका मोटो–भ्लगर समेत बनेका छन्।
उनको एमआरबी भ्लग च्यानलमा १४ लाख ५० हजार हाराहारी सबस्क्राइबर जोडिएका छन्।
यता, पोखराकी सुरक्षा केसीले पाँच/छ वर्षको छोटो समयमै युट्युबमा ८ लाख बढी सबस्क्राइबर कमाइसकेकी छन्।
नेपालका धेरै ठाउँको यात्रा गरेका उनीहरू मोटरसाइकलमा भारतको लद्दाख, असम पनिपुगिसकेका छन्। यो जोडी मोटो–भ्लगिङकै क्रममा एकअर्कासँग निकट भएका थिए। र, केही समयको प्रेमपश्चात दुई वर्षअघि विवाह गरे।
यसै साता सेतोपाटी स्टुडिओमा यी दुईले करिअर, प्रेमदेखि आगामी योजनाबारे भिडिओ कुराकानी गरेका छन्।
त्यस क्रममा विविदले आफूले स्कुल पढ्दादेखि नै मोटरसाइकल चलाउने गरेको बताए।
सुरूआती दिन सम्झिँदै उनले भने, 'मेरो घरअगाडि एक जना अंकल हुनुहुन्थ्यो। ८/९ कक्षामा पढ्दै गर्दा नै उहाँको बाइक चलाउथेँ।'
उनले एसएलसी सके, त्यसपछि सुरूमा बुवाको मोटरसाइकल चलाए। पछि बुबाले उनलाई मोटरसाइकल किनिदिए। विविद पढाइमा अलि अल्छी थिए। छोराले पढ्ला भनेर मोटरसाइकल किनिदिएको उनलाई लाग्छ।
युट्युबमा बाइकबारे भिडिओ हेर्ने क्रममा भ्लगहरू देखेपछि उनलाई पनि त्यसतर्फ रूचि लाग्यो। त्यसपछि उनले मोटो भ्लग बनाउन थाले।
विविदका अनुसार एकदिन उनले र्यापर गिरीश खतिवडाको भ्लग हेरेका थिए।
'उहाँ बोलेर भिडिओ बनाएको हेर्न मज्जा आयो। अनि मैले पनि बोलेर मोटो भ्लग बनाउने सोचे। तर सुरूमा त मलाई बोल्नै नआउने,' विविदले भने, 'सुरूमा भ्युज पनि आउँदैन थियो। साथीको मोबाइलबाट नाइस राइड भन्दै कमेन्ट समेत गर्थेँ।'
नेपालको सबभन्दा लोकप्रिय र पहिलो बाइक रियालिटी शो 'पल्सर डेयर भेन्चर' मा गएपछि विविदको चर्चा थप चुलियो।
विविद के गर्दैछन् भन्नेबारे परिवारले भने पछिसम्म कुनै भेउ पाएका थिएनन्।
'एक लाख सबस्क्राइबर हुँदासम्म पनि आमालाई थाहा थिएन। जब लकडाउन भयो, त्यति बेला धेरै समय उहाँसँग घरमा बिताएँ। त्यस बेला भिडिओ बनाउँदा सोधीखोजी गर्नुभएपछि बल्ल उहाँलाई बुझ्ने गरी भनेको हुँ,' उनले भने।
यता, सुरक्षाको करिअर नृत्यबाट सुरू भएको हो।
उनी आफ्नो करिअरको सुरूआती दिनबारे भन्छिन्, 'म सानैदेखि नाच्थेँ। स्कुल पढ्दै गर्दा पनि नाचेको भिडिओ टिकटकमा पोस्ट गर्थेँ। ती भिडिओ निकै भाइरल भए। पछि कभर भिडिओ बनाएर युट्युबमा राख्न थालेँ। ती भिडिओ निकै चर्चामा आए। ट्रेन्डिङमा पर्न थाले।'
उनलाई कसैले केही काम गरिरहेको देख्दा, त्यो आफूले पनि गर्न सक्छु भन्ने विश्वास लाग्थ्यो।
भलिबल खेलेको देख्दा उनलाई पनि खेल्न मन लाग्थ्यो। प्रयास गर्थिन्। एक सातामै सिक्थिन्। स्कुलमा धेरै खेलहरू खेलिन्। कक्षा १० पढ्दासम्म भलिबल, फुटबल, एथ्लेटिक्स, बास्केटबल, कबड्डी सबै खेलिन्।
दस कक्षापछि भने बाइक चलाउने सोख बढेको उनले बताइन्। उनले दाइलाई फकाएर बाइक सिकाउन लगाइन्। त्यतिञ्जेल युट्युबमा ३५ हजार सबस्क्राबर पुर्याइसकेकी थिइन्।
'त्यसपछि मोटो–भ्लगिङ गर्नुपर्यो भन्ने लाग्यो। अरू दाइहरूका भ्लग हेर्न थालेँ,' उनले भनिन्, 'सामान किन्ने पैसाका लागि चाहिँ मलाई गाह्रो भएन। परिवारले ल्याइदिनु हुन्थ्यो। सबै पाएपछि सुरूदेखि नै राम्रा भिडिओ दिन लागेँ।'
१७ वर्षको उमेरमा मोटो–भ्लगिङ सुरू गरेकी उनले सोही वर्ष युट्युबमा एक लाख सबस्क्राइबर पुर्याइन्।
परिवारले छोरीको इच्छा पुर्याइदिए पनि सुरक्षालाई सहज भने थिएन। केटी मान्छेले बाइक कुदाएको भन्दै उनीमाथि थुप्रै प्रश्न समेत आउँथे।
आमाको कुरा हुन्थ्यो, 'बरू गाडी सिक। गाडी सुरक्षित हुन्छ। बाइक नचलाऊ।'
तर सुरक्षा प्रतिबद्ध थिइन्।
भनिन्, 'आँटेको नपाउँदा मेरो मन मान्दैन थियो। परिवारले बाइक नचलाऊ भने पनि रोक्नु चाहिँ भएन। त्यस बेला कति प्रश्न सामना गर्नुपर्थ्यो। बिस्तारै अहिले केही परिवर्तन हुँदै आएको छ। अहिले कतिले मेरो छोरी पनि तिमीजस्तै भइदिए हुन्थ्यो भन्नुहुन्छ। त्यसमा एकदमै खुसी लाग्छ।'
सुरूआती समयमा महिला राइडर कम थिए, अहिले बढेको सुरक्षा बताउँछिन्।
भ्लगिङका क्रममा विविद र सुरक्षा विभिन्न ठाउँ घुमिरहेका मात्र हुँदैनन्, त्यहाँको विकासको गति समेत नियाल्ने अवसर पाउँछन्।
यसबारे उनीहरूको भनाइ छ, 'विकास हुँदै नभएको चाहिँ होइन। तर गति एकदमै सुस्त छ।'
विविद र सुरक्षाको जोडीले पछिल्लो समय अन्य रमाइला भ्लगहरू पनि बनाएर राखिरहेका हुन्छन्। त्यसबाट उनीहरूले छोटो समयमै लाखौं दर्शक कमाइरहेका छन्। भ्लगिङको यात्रालाई पछिसम्मै निरन्तरता दिने उनीहरू दुवैको योजना छ।
'कतै जाँदा भ्लग बनाएनौं भने हामी किन यहाँ आएको भनेजस्तो हुन्छ। यसमा बानी भइसक्यो। भविष्यमा सन्तान भइसकेपछि पनि उनीहरूसँग मोटो–भ्लगिङ गर्छु होला,' यति भन्नासाथ उनले विविदलाई सोधिन्, 'आर यू रेडी?'
विविदले के प्रतिक्रिया दिए होलान्?
यो जोडीको कुराकानी विस्तृतमा हेर्नुस् भिडिओमाः
-1754812957.jpeg)
-1746009348.jpg)
