द कन्भरसेसन- ३९
सेतोपाटी कन्भरसेसनको आजको अंकमा एउटै परिवारका तीन दाजुभाइ आपसमा कुराकानी गर्दै छन्। परिवारका चारमध्ये यी तीन दाजुभाइले कलाकारिता क्षेत्रमा आ-आफ्नो छुट्टै पहिचान बनाएका छन्।
हामी कुरा गर्दैछौं, प्रकाश सपुत दाजुभाइको।
प्रकाशले सांगीतिक क्षेत्रमा आफ्ना सिर्जनामार्फत धूम नै मच्याए भन्दा फरक नपर्ला! उनले फिल्म अभिनेताका रूपमा सफलताको स्वाद चाखिसकेका छन् भने निर्देशकका रूपमा उनको पहिलो फिल्म 'वसन्त' चैत २२ देखि प्रदर्शनमा आउँदैछ।
बाग्लुङको गाउँमा सामान्य परिवारमा जन्मिएका उनले कलाकारिता क्षेत्रमा लागेर पाएको ख्याति साँच्चिकै लोभलाग्दो र प्रेरणादायी छ।
उनका भाइ देवेन्द्र बब्लुले आफ्ना गीतमार्फत विशेषगरी युवा पुस्ताको मन जितिरहेका छन्। उनका 'म त पर्खेको पर्ख्यै छु', 'भेटै हुन्न कि', 'बिना स्वादैको' सम्मका गीत निकै रूचाइएका छन्। उनले नाटक र फिल्ममा समेत अभिनय गरिसकेका छन्।
अर्का भाइ सुनिल बिक पनि यति बेला म्युजिक भिडिओ निर्देशनमा रमाइरहेका छन्। 'अरेली काँडैले', 'नभन विदेशी', 'लौन नी भैया', 'सेती दोभान' जस्ता गीत उनको निर्देशनमा बनेका चलेका गीतमध्ये पर्छन्।
उसो त प्रकाश, देवेन्द्र र सुनिल यसअघि पनि आफ्ना प्रोजेक्टबारे एकअर्कासँग सल्लाह र समन्वय गर्दै आएका थिए। प्रदर्शन क्रममा रहेको फिल्म 'वसन्त' मा भने यी तीनै जनाको प्रत्यक्ष सहभागिता छ।
प्रकाश यो फिल्मका निर्देशक तथा अभिनेता हुन्। फिल्ममा समावेश 'बिना स्वादैको' गीत देवेन्द्रले नै तयार पारेका हुन्। सुनिलले फिल्ममा सह–निर्देशक बनेर दाइ प्रकाशलाई सघाएका छन्।
सेतोपाटी कन्भरसेसनको यो अंकमा प्रकाशका तीन दाजुभाइले आफूहरूको बाल्यकाल, बाल्यकालका रमाइला किस्सादेखि उनीहरू तीन जना कसरी कलाकारितामै लागे भन्नेबारे बताएका छन्।
दाइ कलाकारितामा बढी जमेको हुँदा भाइहरूलाई त्यसको कति फाइदा भयो भन्ने पनि समीक्षा गरेका छन्।
प्रकाश सपुतले आफ्नो पछिल्लो विवादलाई लिएर भाइहरूलाई प्रश्न समेत सोधेका छन् – यस्ता कुराहरू आइरहँदा तिमीहरूलाई कस्तो लाग्छ?
फिल्म 'वसन्त' बारे जानकारी दिँदै आगामी योजनाबारे समेत बताएका छन्। त्यस क्रममा प्रकाशले भनेका छन्, 'अझै केही वर्ष सिर्जनामार्फत प्रश्न गर्ने हो।'
हेर्नुहोस् प्रकाश सपुत र उनका भाइहरू देवेन्द्र बब्लु र सुनिल बिकको भिडिओ कुराकानी, सेतोपाटी कन्भरसेसनमा —
-1742801159.jpg)
