वर्षौंदेखि खण्डहर बनेको बुटवल ट्राफिक चोकस्थित फिल्म हलको प्रांगणमा चार सातायता मानिसहरूको चहलपहल देखिन्छ।
प्रांगणको पूर्वतर्फ बुटवल उपमहानगरपालिकाले पार्किङ क्षेत्र तोकिदिएको छ। त्यहाँ गाडीहरू लस्करै पार्किङ गरिएका छन्। पश्चिमतर्फ एउटा कुनामा 'स्वदेशी उत्पादन हाम्रो अभियान, हाम्रो स्वाभिमान हाम्रो पहिचान: खस्यौली बजार' लेखिएको ब्यानर झुन्ड्याइएको छ।
बीच भागमा ढुंगा र काठ थुपारिएको छ। जल र फूल राखेर सजाइएको तामाको ताउलो, गौतमबुद्धको मूर्ति र मगमग बास्ना छर्दै बलिरहेको धुपले त्यहाँ पुग्नेहरूलाई स्वागत गरेको हुन्छ।
