पोखरा भ्रमण वर्ष २०२५ को घोषणासभामा बिस्फोट भएर आगो लागेको हाइड्रोजन भरिएको बलुन अहिले पनि बजारमा छ्याप्छ्याप्ती भेटिन्छन्।
फागुन ३ गते पोखरा भ्रमण वर्ष उद्घाटन क्रममा आगोको झिल्का परेर बलुन पड्किँदा अर्थमन्त्री विष्णु पौडेल र पोखराका मेयर धनराज आचार्य घाइते भएका थिए। उनीहरूको अनुहार र हात आगोले जलेको अस्पतालले जनाएको छ।
पोखरामा प्राम्भिक उपचारपछि काठमाडौं लगिएका दुईमध्ये अर्थमन्त्री पौडेल सोमबार डिस्चार्ज भएका छन् भने पोखराका मेयर आचार्यलाई अझै केही दिन अस्पतालमै राखेर उपचार गर्नुपर्ने स्वास्थ्यकर्मीहरूले बताएका छन्।
यसै सन्दर्भमा अमेरिकाको युनिभर्सिटी अफ इलनोयबाट केमिकल इञ्जिनियरिङमा विद्यावारिधि गरेका डा. सन्तोष कोइरालासँग हामीले हाइड्रोजन ग्यासको सार्वजनिक प्रयोग र त्यसले ल्याउने जोखिमबारे कुराकानी गरेका छौं। पोखराका स्थायी बासिन्दा कोइरालाले गण्डकी प्रदेश विज्ञान तथा प्रविधि प्रतिष्ठानमा वैज्ञानिकका रूपमा काम गरेका थिए।
हामीले उनलाई सोध्यौं — हाइड्रोजन ग्यास के हो? यो किन यति धेरै खतरनाक छ? यसको सदुपयोग कसरी गर्न सकिन्छ? र, राज्यले हाइड्रोजन लगायत ग्यास र रासायनिक पदार्थको दुरूपयोग कसरी नियमन गर्नुपर्छ?
हाइड्रोजन ग्यास खतरनाक भएकाले जथाभाबी प्रयोग गर्न नहुने उनी बताउँछन्। बालबालिकाले खेलाउने बेलुनमा सबभन्दा प्रज्वलनशील ग्यास भर्दा खतरा बढ्ने रसायनशास्त्रका वैज्ञानिक डा. कोइरालाको भनाइ छ।
हेर्नुहोस् डा. सन्तोष कोइरालासँगको भिडिओ कुराकानी —
