घाँटीमा हड्डी, माछाको काँडा लगायत अड्कियो भने के गर्ने, उपचार गर्न कहाँ जाने लगायत विषयमा धेरैलाई जिज्ञासा हुन्छ। हामीले वीर अस्पतालमा कार्यरत वरिष्ठ नाक, कान, घाँटी रोग विशेषज्ञ डा. अरूण केसीसँग यसबारे भिडिओ कुराकानी गरेका छौं।
उनका अनुसार घाँटीमा हड्डी अड्किएर अस्पताल आउनेको संख्या धेरै हुन्छ। चपाएर नखाने, राम्रोसँग नखाने, दाँत नभएकाको घाँटीमा हड्डी अड्किने समस्या हुन्छ। माछामासुसँग रक्सी खानेलाई हड्डी अड्किने समस्या हुन्छ। नसा सम्बन्धी रोग भएकाको पनि घाँटीमा हड्डी अड्किन सक्छ।
घाँटीमा श्वास नली र खाने नली हुन्छन्। धेरैजसो चिज खाने नलीमै अड्किन्छ। त्यस्तो अवस्थामा थुक पनि निल्न नसक्ने अवस्थामा बिरामी आइपुग्छन्। स्वास्थ्य परीक्षण गरेपछि त्यहीअनुसारको उपचार गरिन्छ।
हड्डी अड्किँदा केरा, लालिगुँरास खायो भने जान्छ भन्ने आमबुझाइ छ। यो बुझाइ गाँउमा अझै धेरै छ। तर यो सरासर गलत हो। घाँटीमा हड्डी अड्किएपछि अस्पताल आउन जरूरी छ। अस्पताल आएपछि बिरामीको एक्सरे गरेर हेरिन्छ। कतिपय अवस्थामा इन्डोस्कोपी पनि गरिन्छ। धेरैजसो समस्या एक्सरेबाटै पत्ता लाग्छ। समस्या पत्ता लगाएपछि बेहोस पारेर उपचार गरिन्छ। कुनै अवस्थामा चिरफार गर्नुपर्दैन। घाँटीबाट पाइप राखेर हड्डी निकाल्न सकिन्छ।
बच्चाहरूले खानेकुराभन्दा सिक्का बढी अड्काउँछन्। सबैभन्दा खतरनाक ब्याट्री हो। ब्याट्री हामीले जति सामान्य देख्छौं, त्यो भन्दा धेरै गुणा खतरनाक छ। अहिले सिक्का कम प्रयोग हुने भएकाले अड्किने क्रम पनि घट्दै गएको छ। ब्याट्रीमा रहेको केमिकलले भित्रका अंगलाई नै हानि गर्छ। त्यसैले यस्तो बेला अझै गम्भीर बन्नुपर्छ।
पूरा भिडिओ हेर्न यहाँ क्लिक गर्नुहोस्-
