मधुमेह (सुगर) का बिरामीले सधैंभरि औषधि खाइरहनु नपर्ने र जीवनशैलीमा ध्यान दियो भने औषधि बन्द पनि हुनसक्ने डा. कामक्ष शाहले बताएकी छन्।
'सुगरका बिरामीले सधैंभरि औषधि खाइरहनुपर्दैन,' डा. शाहले सेतोपाटीसँगको कुराकानीमा भनिन्, 'तपाईंले सुगर देख्नेबित्तिकै आफ्नो जीवनशैलीमा ध्यान दिनुभयो भने औषधि खानु नपर्ने पनि हुनसक्छ।'
'हामी डाक्टरको काम औषधि दिने हो तर औषधि घटाउने हो वा बन्द गराउने कुरा बिरामीहरूमै भर पर्छ। जबसम्म तपाईंमा त्यो इच्छा हुँदैन, तबसम्म कुनै पनि औषधिले काम गर्न गाह्रो हुन्छ,' उनले भनिन्।
उनले यो पनि भनिन्, 'डाइबिटिज भनेको दीर्घकालीन रोग वा सधैं बढिराख्ने रोग हो भनेर हामीले अहिलेसम्म बुझेका छौं। तर यो एकदमै गलत हो। यो रोगलाई हामीले जरैबाट निको पार्न सक्छौं। डाइबिटिज भयो भनेर थाहा हुनेबित्तिकै आफ्नो जीवनशैलीमा ध्यान दिनुभयो भने यो रोग जरैबाट निको हुन्छ। औषधि खाइरहेका मान्छेको औषधि बन्द भएको उदाहरण पनि छ।'
