अनेक ल्याब अध्ययन थेसिस गरायो
नानाथरी एक्सपेरिमेन्ट गर्न लगायो
यो साइन्सले हामीलाई यस्तो के गरायो
सिधा सरल जीवनलाई कम्प्लिकेटेड बनायो
मोटर पानीजहाज एरोप्लेन बनायो
आफ्नो ठाउँ छोडाएर समुद्रपारि हुर्यायो
यो साइन्सले हामीलाई यस्तो के गरायो
धर्म संस्कृति हरायो पहिरन भाषा हरायो
तोप बन्दुक बनायो मिसाइल बम बनायो
त्यही पड्कायो मानिस-मानिस भिडायो
यो साइन्सले हामीलाई यस्तो के गरायो
सबै ध्वस्त बनायो लासको ढेर लगायो
कम्प्युटर सिनेमा टेलिभिजन बनायो
भुलभुलैयामा भुलायो दिमाग खलबलायो
यो साइन्सले हामीलाई यस्तो के गरायो
सेलफोनको लतमा जीवनको लक्ष्य बिर्सायो
अनेक मेसिन बनायो उद्योगधन्दा खुलायो
धूलो धूवाँ केमिकलले प्रदूषण फैलायो
यो साइन्सले हामीलाई यस्तो के गरायो
नदीनाला मैलायो फोहरले रोग मौलायो
नानाथरी औषधी बनायो अप्रेसन चलायो
चाहिने नचाहिने उपचारले साह्रै नै गलायो
यो साइन्सले हामीलाई यस्तो के गरायो
नक्कली दाँत थपायो चस्माको पावर बढायो
प्रकृतिले त मानिसलाई साइन्स बिनै जन्मायो
खाने पिउने र सन्तानोत्पादनको जिम्मा लगायो
यो साइन्सले हामीलाई यस्तो के गरायो
परिवार नियोजन चलायो सन्तति नै घटायो।
