एक सुन्दर घर
जहाँबाट सुरू भयो यात्राको परिभाषा
सायद साथ चाहिएरै होला
यात्रालाई पनि बाटो आइपुगेको।
यही बाटो भएर कयौँ हिडिसके कहाँ कहाँसम्म
यही बाटो भएर हो मुर्दा पनि घाटसम्म पुग्ने।
यही बाटो भएरै हो गर्भवती अस्पतालसम्म पुग्छिन्
र
जन्माउछिन् एक खुसी
एक भविष्य।
यही बाटो भएरै हो ठुल्दाजु भूमिगत भएको
यही बाटो भएरै हो
बा
साहरसम्म पुग्थे
र
ल्याउथे
केही केजी नुनका ढिक्का
यही बाटो भएर हो कान्छो छोरो विदेश पुग्यो
यही बाटो भएर ऊ फर्कदै छ यार
अप्रत्याशित रूपमा काठको बाकसमा
जुन खुसीमा कान्छो विदेश पुगेथ्यो
त्यो खुसी विदेशले चुसेपछि
ऊ खोक्रो भएर फर्कदै छ
खोक्रो बाकसमा
खुसीको रस संगालेर फर्कन्छु सोच्दै थियो कान्छो
भएको खुसी पनि चुसाएर फर्कदै छ ऊ।
सोच्नेले सोचेका थिए होलान्
यही बाटो भएर पुगिन्छ सत्तासम्म
यही बाटो भएर पुगिन्छ सहरसम्म
यही बाटो पुगिन्छ त्यो ठाँउ
जहाँ एक जोर नयाँ लुगा पाइन्छ
तर, सोच्नेले यो सोचेनन्
यही बाटो भएर आउँछन् केही मान्छे
जो झुटको आश्वासन छर्छ र भोट फलाउँछन्
यही बाटो भएर आउँछन् केही मान्छे
जो देश बिगार्छन्
र जनता लडाउँछन्
यही बाटो भएर आउँछन् केही मान्छे
जो भन्न सक्दैनन्
गाँउमै बस यार युवा, केही गर
केही सकेनौ भने एकछाक खाना
र
एक घुड्की पानी
म मिलाउँला।
यही बाटो पुगिन्छ त्यो ठाँउ
जहाँ एक थान ऐना पाइन्छ
जुन ऐनामा देखिन्छ
स्वयम् मैरै अनुहार
जस्लाई नियालेर धिक्कार्न बहुत सहज लाग्छ मलाई।
