सपनाको ईश्वर


एउटा ढुङ्गा छ मेरो आँगनमा

मैले फूलहरूको बीचमा राखेको छु त्यसलाई,

अलिकति उठेको एक छेउ

मलाई उसको शिर जस्तै लाग्छ,

अलिकति उठेको उसको अर्को छेउ

मलाई खुट्टा जस्तै लाग्छ

म आँखा देख्छु साना खाल्टोहरूमा

आकृति बनाउँछु

म अनुभूत गर्छु उसको मुटु

प्रेम गर्छु

पूजा गर्छु म त्यो ढुङ्गाको ।

 

 

उसले देख्दैन मलाई

र चिन्दैन पनि,

उसले सुन्दैन मलाई

र मेरो कुरा बुझ्दैन पनि,

मेरो पूजा र प्रेमको

के अर्थ छ कुन्नि उसका लागी ?

तर

म उसलाई पूजा गर्छु ।

 

 

उसलाई घृणा गर्ने हरू पनि छन्

घृणा किन गर्छन् मलाई थाहा छैन

सायद उनीहरु उसलाई ढुङ्गा माँत्रै देख्छन्

अथवा ईर्श्या गर्छन् मेरो पूजाको,

दिनदिनै बाटोबाट

फुत्त छेउको ढुङ्गा टिप्छन्

र फाल्छन् मेरो आँगनको ढुङ्गामा

म  फालेर फुटेका ढुङ्गाहरू जम्मा पारेर

मन्दिर बनाईरहेछु

मेरो ईश्वरको !

 

 

 

शीत झर्छ

घाम पर्छ

पानी खस्छ

अँध्यारो बस्छ मेरो ईश्वरमा,

उ जति राम्रो केही लाग्दैन मलाई

उ जति पूर्ण कोही लाग्दैन मलाई,

उसैमा ठोकिएर एक छेउबाट

छिर्छ घाम मेरो ढोका भित्र

घर र मेरो मनका

सबै अँध्यारा कुनाहरूसम्म,

अर्को छेउबाट

ठोकिएर बाटोका ढुङ्गाहरु सम्म पुग्छ

मेरो ढुङ्गाको  उँज्यालो !

 

अप्रिल ११, २०१८

टिमिन्स, क्यानडा

 

 

Share:

© 2017 Setopati Sanchar Pvt. Ltd.