गैरकानुनी बाटोबाट विदेसिने महिलाहरुलाई सरकार एक्लैले रोक्न सक्दैन: श्रम मन्त्री


श्रममन्त्री फरमूल्लाह मन्सुरले श्रम सम्झौता नभएको मुलुकमा महिला कामदारलाई जान नदिन सरकार दृढ रहेको बताएका छन्।

मन्त्री मन्सुरले गैरकानुनी बाटोबाट कामको खोजीमा विदेश जाने महिलाहरुलाई रोक्न भने सरकार एक्लैको प्रयास पर्याप्त नहुने पनि स्विकार गरे। व्यवस्थापिका संसद अन्तर्गतको अन्तर्राष्ट्रिय सम्बन्ध तथा श्रम समितिको बुधबारको बैठकमा बोल्दै उनले गैरकानुनी बाटोबाट विदेश जाने महिलाहरुलाई रोक्न संसदीय समितिसँग सहकार्य गरेर अघि बढन सरकार तयार रहेको बताए।

बैठकमा समितिका सदस्यहरुले कानुन विपरित विदेशमा काम गर्न जान नदिन सरकारले नसकेको आरोप लगाएका थिए। उनीहरुले कामदारहरुलाई विदेशमा पठाउँदा श्रम स्विकृति लिने व्यवस्थालाई कडाई गर्न श्रम मन्त्रालय, परराष्ट्र मन्त्रालय र सम्बन्धित देशका दुतावासहरुले काम गर्न नसकेको भन्दैआपत्ति पनि जनाएका छन्।

अन्तर्राष्ट्रिय सम्बन्ध तथा श्रम समितिले नेपाली कामदारहरुलाई विदेश पठाउँदा अनिवार्य रुपमा श्रम सम्झौंता गर्न सरकारलाई पटक पटक सचेत गराउँदै आएको छ।

 

Share:

© 2017 Setopati Sanchar Pvt. Ltd.