लण्डनस्थित नेपाली दूतावासमा नेपालको विकाससँग सम्बन्धित विषयमा एक विशेष कन्फ्रेन्सको आयोजना गरी गणतन्त्र दिवस मनाइएको छ।
नेपालको डेभलपमेन्ट सेक्टरसँग सम्बन्धित बेलायती तथा नेपाली समुदायका झण्डै ३ सय जनाको सहभागितामा कार्यक्रम गरिएको हो।
कार्यक्रमलाई सम्बोधन गर्दै प्रमुख अतिथि बेलायतका पूर्वमन्त्री टोनी बाल्डरीले आर्थिक विकासको बाटोबाट समृद्ध नेपाल निर्माण गर्ने नेपाल सरकारको अभियानमा बेलायतको साथ, सहयोगको प्रतिबद्धता व्यक्त गरे।
बृहत कन्सल्टेसनपछि निर्माण गरिएको नेपालको जस्तो उत्कृष्ट संविधान विश्वका निकै कम देशहरुमा बन्ने गरेको भन्दै उनले नेपालको नयाँ संविधानको प्रशंसा समेत गरे।
नेपालमा राजनीतिक स्थिरता र सरकारले लिएको उदार आर्थिक नीतिको प्रसंग जोड्दै उनले नेपालमा लगानी गर्न यो समय उपयुक्त रहेको बताए।
बेलायतका लागि नेपाली राजदूत दुर्गाबहादुर सुवेदीले नेपाल सरकारले आर्थिक विकास र समृद्धिलाई प्रमुख प्राथमिकतामा राखेको जानकारी दिए।
समृद्ध नेपाल निर्माणको अभियानमा बेलायतसहितका सम्पूर्ण मित्रराष्ट्रबाट उपयुक्त सहयोग र समर्थन नेपालले अपेक्षा गरेको उनले बताए।
सो अवसरमा मन्तव्य राख्दै बेलायत सरकारका विभिन्न निकायका अधिकारी, नेपालको विकासका लागि सक्रिय विभिन्न बेलायती संघसंस्थाका प्रतिनिधीले नेपालको आर्थिक विकासको अभियानमा बेलायतको सरकार र नागरिकस्तरबाट सदैव सहयोग र शुभेच्छा रहने बताए ।
समारोहमा बेलायत नेपाल कुटनीतिक सम्बन्धमा महत्वपूर्ण योगदान गरेको भन्दै प्राध्यापक सुर्य सुवेदीलाई सम्मान गरियो।
सोही अवसरमा नेपालमा क्रियाशिल विभिन्न बेलायती च्यारिटी संस्थाहरुको नेटवर्क ब्रान्गोको औपचारिक लञ्च गरियो भने अ ट्राभल गाइड टु धौलागिरी को विमोचन तथा चित्रकार सम्झना राजभण्डारीको नेपालसम्बन्धी चित्रकला प्रदर्शनीको उद्घाटन पनि गरिएको थियो।
त्यस अवसरमा विभिन्न नेपाली गीत तथा नृत्यसहितका सांस्कृतिक कार्यक्रमहरु पनि प्रस्तुत गरिएको थियो ।
कार्यक्रममा विशेषत आमन्त्रित बेलायती अतिथिको उल्लेख्य उपस्थिति थियो।
