मूर्ख दिवस


शहरभरी

पर्चा टाँसिएको थियो

मूर्ख दिवसको

मिति

समय

स्थान…

सबै लेखिएको थियो।

 

समूह समूहमा

ठाउँ ठाउँबाट

आए मान्छेहरू

बिल्ला लाएर

गुरूहरू

चेलाहरू

नेताहरू

कार्यकर्ताहरू

सबै सबै

उपस्थित थिए दिवस मनाउँन।

 

हेरिरहे मूर्खहरु सबैले

जात्रा थियो

उत्सव थियो मूर्खहरुको

अरु नामूद मूर्खहरु

प्रख्यात मूर्खहरु

नाटक खेलिरहेका थिए

सज्जन मूर्खहरुले

हेरिरहेका ।

 

रङ्ग थियो

बिचार थियो

हुनुपर्ने सबै थियो सायद

हेर्ने आँखा बाहेक;

जीवन थियो

सपना थियो

रहर थियो !

 

उद्घोषकले बधाई दिए

सबै मूर्खहरुलाई

हेरेर मुस्काए सबैजना

देखेर मूर्खहरु

झुण्ड झुण्डमा;

सभा मूर्खहरुको !

 

मार्च ३१, २०१८

Share:

© 2017 Setopati Sanchar Pvt. Ltd.