ग्लोबल नेपाली
सिन्धुपाल्चोकका कुमार विक श्रीमतीलाई साथ लिएर सन् २०१८ मा अस्ट्रेलिया पुगे। त्यहाँ एउटा रेस्टुरेन्टको किचनमा काम सुरू गरे तर एक साताभन्दा बढी टिक्न सकेनन्। रेस्टुरेन्टमा काम गर्नु बाध्यता थियो तर त्यसमा रूचि थिएन।
काम खोज्दै जाँदा मेलवर्नमा रहेको ‘सिएर होम्स’ मा पुगे। त्यही कम्पनीमा घरको बाहिरी डिजाइन गर्ने ‘ल्यान्ड स्केपिङ’ सम्बन्धी काम पाए।
अस्ट्रेलियामा हाउजिङ कम्पनीले घर बनाएपछि बाहिरी डिजाइनको काम ल्यान्ड स्केपिङ कम्पनीले गर्छ।
केही समय सिएर होम्समा काम गरेपछि कुमारले ‘एभरेस्ट ल्यान्ड स्केपिङ’ कम्पनी खोलेर आफ्नै काम थाले।
‘मैले सुरूको केही समय अरूकै काम गरेँ। त्यसपछि आफ्नै कम्पनी सुरू गरेको हुँ,’ कुमारले भने, ‘अस्ट्रेलियामा घर बनाउँदा ३० प्रतिशत जमिन खुला छोड्नुपर्छ। हरियाली पनि हुनुपर्छ। हामी यसैअनुसार डिजाइन गरिदिन्छौं।’
ल्यान्ड स्केपिङ अन्तर्गत पर्खाल, पार्किङ, कार्पेटिङ, पार्किङ, करेसाबारी, बगैंचा लगायतको काम हुन्छ। ल्यान्ड स्केपिङले घरको बाहिरी परिवेश सुन्दर बनाउने काम गर्छ।
कम्पनीले घर परिसर प्राकृतिक वातावरणअनुकूल बनाउन घरधनीको चाहनाअनुसार सजावट गरिदिन्छ।
कुमार भन्छन्, ‘कुनै घर कम्पाउन्डमा बाहिरबाट माटो राख्नुपर्ने हुन्छ। कुनै घरबाट माटो फाल्नुपर्ने हुन सक्छ। हामी सबै मिलाएर चिटिक्क बनाउँछौं।’
उनका अनुसार ल्यान्ड स्केपिङको काम घरबाहिर हुने भएकाले मौसमको प्रभाव पर्छ। जाडो मौसममा धेरै जाडो र गर्मी मौसममा धेरै गर्मी हुने भएकाले काम निकै कठिन हुन्छ।
उनी भन्छन्, ‘मेलवर्नमा एकै दिनमा चार सिजन हुन्छ। काम निकै चुनौतीपूर्ण हुन्छ।’
कुमार गुगल रिभ्यू, रिफ्रेन्स, सामाजिक सञ्जाल र चिनजानको आधारमा कामको मेसो मिलाउँछन्। नेपाली समुदायको बसोबास बढ्दै गएकाले उनलाई काम पाउन केही सहज पनि हुने गरेको छ।
नेपाली समुदायका अतिरिक्त अन्य बासिन्दाले पनि उनलाई काम दिन्छन्। यसमा भारतीय समुदायका बासिन्दा बढी हुन्छन्।
ल्यान्ड स्केपिङमा काठको र माटाको काम जानेको हुनुपर्छ। इन्जिनियरिङको पृष्ठभूमि भएकालाई सजिलो हुन्छ। यो काममा तालिम पनि आवश्यक पर्छ।
कुमारले नेपालमा हुँदै घर निर्माण र सजावटमा केही अनुभव हासिल गरेका थिए। त्यो अनुभवले उनलाई अस्ट्रेलियामा सजिलो भयो।
‘हामीले ग्राहकको चाहना अनुसारको डिजाइन गर्ने हो। यो काम जमिनको बनावटमा पनि भर पर्छ,’ उनी भन्छन्, ‘यसको खर्च जमिनको अवस्था र डिजाइनमा भर पर्छ।’
-1739869914.jpeg)
ल्यान्ड स्केपिङमा सामान्यतया २५ हजार अस्ट्रेलियन डलरसम्म खर्च लाग्छ। यसभन्दा बढी खर्च घरधनीको चाहनामा भर पर्छ। आफ्नो कम्पनीले ६ लाख डलरसम्मको ल्यान्ड स्केपिङ गरेको कुमारको भनाइ छ।
एभरेस्ट ल्यान्ड स्केपिङले मेलवर्नमा धारा र बिजुली बत्ती मर्मतको काम पनि गर्छ।
‘नेपालमा घरको बाहिरी सजावटमा खासै चासो दिने चलन छैन। कुनै योजनाबिनै घर बनाइन्छ,’ कुमार भन्छन्, ‘अस्ट्रेलियामा पानी, बाटो, बिजुली जस्ता सबै पूर्वाधार तयार भएपछि मात्र घर बनाइन्छ। ल्यान्ड स्केपिङमा ध्यान दिइन्छ।’
कुमारले नेपालमा पनि व्यवसाय सुरू गरेका छन्। हालै उनले ललितपुरको हरिसिद्धीमा फेमिली रेस्टुरेन्ट खोलेका छन्। उनका अनुसार रेस्टुरेन्ट निकै व्यवस्थित र सुविधासम्पन्न छ।
रियल स्टेटको काम पनि सुरू गरेका छन्। बिक्रीका लागि केही घर तयार छन्।
सेतोपाटी ग्लोबलका अन्य सामग्री पढ्न यहाँ क्लिक गर्नुहोस्
ग्लोबल नेपालीबारे यो इमेलमा सम्पर्क गर्नुहोस्- setopatidebate@gmail.com
-1742801159.jpg)
