बन्यजन्तु र चराको राजधानी बर्दिया {तस्बिरहरू}

सेतोपाटी संवाददाता

काठमाडौं, मंसिर २८

लामो समयको बन्दाबन्दीले ठप्प भएको नेपालको पर्यटन बजार बिस्तारै लयमा फर्कदै छ।

कोरोना संक्रमणले पर्यटन व्यवसायीहरू निरास भइरहेको बेला बर्दियाका व्यवसायी केही उत्साहित देखिन्छन्।

कोरोनाका कारण लकडाउन भएदेखि सुनसान रहेका बर्दियाका होटल तथा होमस्टेमा केही समयदेखि चलायमान हुन थालेका छन्। आन्तरिक पर्यटकहरू दैनिक बर्दिया आउन थालेका छन्।

बाघका लागि बर्दिया राष्ट्रिय निकुञ्ज संसारमै प्रख्यात छ। त्यहाँ ८५ वटा बयस्क बाघ छन्। स–साना डम्मरुको संख्या पनि उल्लेख्य छ। निकुञ्जमा चैतदेखि असारसम्म बाघ हेर्न सकिन्छ। गर्मीमा ती पानी खान र डुबुल्कि मार्न निकुञ्जका खोलामा आउँछन्। घन्टौं बस्छन्। त्यतिबेला टाढैबाट तिनका तस्बिर खिच्न सकिन्छ। धेरैले यस्ता तस्बिर खिचेका छन्।

फोटोग्राफरः दीपक राजबंशी

बर्दियाका रैथाने दिपक राजवंशी जंगली जनावरका तस्बिर खिच्न सिपालु छन्। उनी बर्दियाका अघोषित पर्यटन दूत नै हुन्।

५ वर्षदेखि नेचर गाइडका रुपमा काम गर्दै आएका राजबंशीले फोटोग्राफी गर्न थालेको पनि त्यति नै वर्ष भयो। उनका नेचर गाइड गुरु मामा राजमान चौधरी हुन् भने फोटोग्राफीका गुरु ओम यादव।

क्यामेरा बोकेर उनी हरेक दिन जंगल जान्छन्। जनाबर देख्ने वित्तिकै लेन्स सोझ्याइहाल्छन्। बाघका धेरै खाले तस्बिर खिचेका छन् उनले। नजिकैबाट पनि खिचेका छन्। मन र मुटु दरो बनाएर खिच्छन्। बाघको मात्र होइन, जंगली हात्ती, गैंडा, चराचुरुङी लगायत थारु संस्कृति र जीवनशैलीका थुप्रै तस्बिर खिचेका छन् उनले।

संरक्षणको भावना र शौखले उनी जंगली जनावर र पंछीका तस्बिर खिचिरहेका छन्। यसबाट आम्दानी लिन भने सकेका छैनन्।

बर्दियामा बाघ मात्र होइन, अरु जनाबर पनि छन्। ४१ वटा एक सिंगे गैडा, १२० वटा भन्दा बढी जंगली हात्ती छन्। सयौं थरि चरा पनि छन्। खासमा बर्दिया विगतमा राजा/महाराजाको शिकार खेल्ने थलो थियो। निकुञ्ज ९६८ वर्ग किलोमिटरमा फैलेको छ। सन् १९६८ मा शाही शिकार आरक्षका रूपमा स्थापना गरिएकामा सन् १९८८ मा यसलाई निकुञ्ज बनाइएको हो।

भर्खर २६ वर्षमा हिँड्दै गरेका तन्नेरी फोटोग्राफर दिपक राजबंशीले खिचेका मनै लोभ्याउन तस्बिरहरू हेर्नुहोस्।