नेपाल पर्यटन बोर्डले गर्ने नियमित कार्यक्रम #फोटोनेपाल मा फेब्रुअरी महिनाका लागि लक्ष्मीप्रसाद नाखुसीले मनास्लु क्षेत्रमा खिचेका तस्बिरहरु प्रदर्शनीमा राखेको छ।
प्रत्येक अंग्रेजी महिनाको पहिलो शुक्रबारबाट हुने यो प्रदर्शनी यसपटक माघ १८ देखि २४ सम्म भृकुटिमण्डपस्थित नेपाल पर्यटन बोर्डको कोर्टयार्डमा भइरहेको छ।
नेपाल पर्यटन बोर्डका कार्यकारी प्रमुख दीपकराज जोशीले फोटोनेपाल देश भित्र मात्र सिमित नरहेको बताए। #फोटोनेपाल ले संसारभर रहेका फोटोग्राफरहरुको नेपालमा खिचिएको फोटो प्रदर्शनी गर्ने, छलफल गर्ने र फोटो मार्फत देशको पर्यटन प्रबद्र्धन गर्ने साझा अभियान रहेको उनले बताए।
यो अभियान फेब्रुअरी २०१६ मा टोनी हेगेनका फोटो प्रदर्शनी सँगै सुरू भएको पर्यटन बोर्डका वरिष्ट अधिकारी सुधन सुवेदीले जानकारी दिए।
मार्च महिनाको #फोटोनेपाल मा बेल्जियन फोटोग्राफरले नेपालमा खिचेका फोटोहरुको प्रदर्शनी हुने उनले जानकारी गराए।
माघ २० मा नेपाली सांगीतिक टोली फ्युजनजात्राको सांगीतिक प्रस्तूतिको आयोजना पनि गरिएको थियो।
फोटोनेपाल अन्तर्गत फोटोग्राफरसँग अन्तरक्रिया, सांगीतिक कार्यक्रमहरु पनि आयोजना गर्ने गरिएको छ।
