फूलबारीमा हाइकर्सको मेला

सेतोपाटी संवाददाता

काठमाडौं, कात्तिक २६

स्वास्थ्य पर्यटन प्रवद्र्धन गर्ने उद्धेश्यले हरेक महिनाको चौंथो शनिबार काठमाडौं उपत्यकाको डाँडापाखामा हाइकिङ गराउँदै आएको ललितपुरको प्रकृतिप्रेमि समूहले कात्तिक २५ गते फूलैफूलले ढकमक्क इचंगुनारायण क्षेत्रमा हाइकर्सलाई डुलाएको छ ।

समूहकि सदस्य एवं हाइकिङ विज्ञ रामदेवी महर्जनका अनुसार काठमाडौंको स्वयंभु हल्चोकबाट सुरु भएको हाइकिङ इचंगुनारायण मन्दिर हुँदै बतासे चेकपोष्ट (१६५०मिटर) पुगेर सेतो गुम्बा, आदेश्वर महादेव, सीतापाइला हुँदै हरिसिद्धिसम्म पुगेको थियो । समूहले १२६ औं हाइकिङमा शनिबार १२ किलोमिटर पदयात्रा गराएको हो ।

सयपत्री, गोदावरी र लालुपाते फूलले ढकमक्क बारीमा आँखा जुधाउँदै हाइकिङ गर्न पाउँदा हाइकर्स औधी रमाएका थिए । पहारिलो घाममा आफ्नो स्वास्थ्य आफ्नै हातमा लेखिएको निलो टोपी लगाएर हाइकर्सको लर्को अघि बढ्दा स्थानीयले सोधखोज गरेका थिए । हाइकर्सले उनीहरुलाई स्वास्थ्य ज्ञान दिने खालका पर्चा बाँडेका थिए ।

हाइकिङमा २५५ जना हाइकर्स सहभागि थिए । उनीहरुले अनुशासित ढंगमा पदयात्रा गरे । बतासे डाँडामा स्वास्थ्यवर्धक खाजा खाएर हाइकर्सहरुले स्वास्थ्यमुलक गीतमा नाचगान गरे । उक्त अबसरमा संस्थाका संस्थापक डा. उमेश श्रेष्ठले आफ्नो स्वास्थ्य आफ्नै हातमा लिनु पर्नेमा जोड दिए ।

समूहको अर्को हाइकिङ मंसिर चौंथो शनिबार नयाँ गन्तव्य हुने छ ।

[caption id="attachment_104891" align="alignnone" width="1024"]