केसी अनशनको आठौँ दिन, विधेयक पास गराउन सभामुखले विशेष अधिकार प्रयोग गर्नुपर्छ : केसी

चिकित्सा शिक्षामा व्याप्त बेथिति अन्त्य माग गर्दै १३औं सत्याग्रहमा बसेका डा. गोविन्द केसी। बिहीबार अनसनको आठौं दिन हो। सरकारले उनको माग पूरा गर्ने गरी चिकित्सा शिक्षा विधेयकको परिमार्जित मस्यौदा तयार पारे पनि प्रमुख प्रतिपक्षी एमालेको विरोधका कारण संसद बैठकमा पेस हुन सकेको छैन। तस्बिरः अनिश रेग्मी/सेतोपाटी


आठ दिनदेखि अनशनरत प्रा.डा. गोविन्द केसीले चिकित्सा शिक्षा विधेयक पास गराउन सभामुखले विशेष अधिकार प्रयोग गर्नुपर्ने बताएका छन् ।

संसद्को अवधि शुक्रबार सकिने भएपछि उनले सभामुख ओनसरी घर्तीमगरलाई विशेष अधिकार प्रयोग गरेर विधेयक पास गराउन अपिल गरेका हुन् ।

अनशनस्थल महाराजगन्जमा बिहीबार साँझ पत्रकार सम्मेलन गर्दै केसीले सभामुखलाई माफियाको पक्षमा नभई जनता र देशको पक्षमा उभिन आग्रह गरे । बुधबार र बिहीबारको संसदमा चिकित्सा शिक्षा विधेयक पेस नगर्नु दुःखद भएको उनले बताए ।अाजकाे नयाँ पत्रिकामा अर्जुन अधिकारीले समाचार लेखेका छन् ।

‘महिला, बालबालिका तथा ज्येष्ठ समितिले तोडमोड गरेको विधेयकलाई सरकारले केही परिमार्जन गरेर ल्याउन लागेको छ,’ केसीले भने, ‘तर, माफियाको प्रलोभनमा परेका सांसदहरूले यसलाई रोकिरहेका छन् । यसलाई जनताले बुझ्न जरुरी छ ।’

उनले कुनै पनि हालतमा चिकित्सा शिक्षा विधेयक शुक्रबार बस्ने संसद् बैठकबाट पास हुनुपर्ने माग गरे । ‘म भोकै अनशन बसेको छु, मेरो लागि होइन, देशका लागि हो,’ डा. केसीले भने, ‘माथेमा कार्यदलले तयार पारेको प्रतिवेदनले स्वास्थ्य क्षेत्रमा सकारात्मक परिवर्तन ल्याउँछ, त्यसैले चिकित्सा शिक्षा विधेयक यही संसद्ले पास गर्नुपर्छ ।’

Share:

प्रतिकृया दिनुहोस

© 2017 Setopati Sanchar Pvt. Ltd.