संस्कृति, पर्यटन तथा नागरिक उड्डयन मन्त्री जितेन्द्रनारायण देवले यसपटकको स्थानीय तहको निर्वाचन अत्यन्तै खर्चिलो भएको बताएका छन् । अहिलेकै प्रणाली कायम रहे निर्वाचनमा गरिब र विपन्न परिवारको प्रतिनिधित्व स्थानीय तहमा हुन नसक्ने उनको भनाइ छ । यो खबर हामीले आजको कान्तिपुरबाट लिएका हौ।
चित्रगुप्त सेवा समितिले शुक्रबार आयोजना गरेको कार्यक्रममा मन्त्री देवले भने, ‘अहिलेको निर्वाचन प्रणालीलाई परिवर्तन नगरे गरिबका छोराछोरीले चुनाव जित्न सक्दैनन् ।’ उनले गरिब तथा विपन्नको समेत पहुँचमा प्रतिनिधित्व होस् भन्ने निर्वाचन प्रणालीका विषयमा बौद्धिक वर्गले बहस चलाउनुपर्ने आवश्यकता औंल्याए । अघिल्ला २ चरणका स्थानीय तहको निर्वाचनमा गाउँपालिकाका अध्यक्ष लडदा दुई–तीन करोड रुपैयाँसम्म खर्च गरेको जानकारी पाएको उल्लेख गर्दै मन्त्री देवले भने, ‘खर्चिलो चुनावका कारण गरिब तथा मध्यमवर्गले कसरी चुनाव लड्ने ?’
योग्यता, क्षमतावान् र देश तथा समाजका लागि केही गर्ने भावना बोकेका व्यक्तिलाई स्थानीय निकायको चुनावमा प्रतिनिधित्व गराउनु आवश्यक रहे पनि आर्थिक अभावकै कारण त्यस्ताले वञ्चित हुनुपर्ने अवस्था आउनु विडम्बना भएको उनले बताए ।