मानव तस्करको सेटिङमा फसेर खेलाडीका रूपमा रुस हिँडेका १४ जनालाई त्रिभुवन अन्तर्राष्ट्रिय विमानस्थलस्थित अध्यागमन कार्यालयले फर्काइदिएको छ । काठमाडौंस्थित रसियाली दूतावासबाट प्रवेशाज्ञा (भिसा) पाएका उनीहरूलाई विमानस्थल अध्यागमन कार्यालयले साउन २५ मा फिर्ता (अफ लोड) गरेको हो । मानव तस्करले जनही कम्तीमा ३ लाख लिई ती युवालाई मस्को पुर्याउन सेटिङ गरेको स्रोतले बतायो । मस्को पुगेपछि उतैका मानव तस्करलाई थप रकम दिएर अन्य युरोपेली देश छिराउने सर्त थियो । अध्यागमनले ती युवासँग राष्ट्रिय खेलकुद परिषद्को पत्र नभएपछि अपलोड गरेको हो । विमानस्थल अध्यागमन कार्यालयका निमित्त प्रमुख दीपक नेपालले भने, ‘उनीहरूले खेलाडी भएको प्रमाण जुटाउन नसक्दा र यात्रासमेत शंकास्पद देखिएपछि फिर्ता गरिएको हो ।'
यसैबीच, काठमाडौंस्थित रसियाली दूतावासका एक अधिकारीले चाहिँ सबै कागजात परीक्षण गरेपछि मात्र १४ जनालाई भिसा दिएको दाबी गरे । ‘नक्कली निमन्त्रणामा हामीले कसैलाई पनि भिसा दिएको छैन । कागजपत्र रुजु गरेपछि मात्र भिसा दिएका हौं,' काठमाडौंस्थित रसियाली दूतावासका एक अधिकारीले भने, ‘योभन्दा बढी हामीले बोल्न मिल्दैन । अरू कुरा राष्ट्रिय खेलकुद परिषद् र अध्यागमन विभागसँग बुझ्नुहोला ।'
राष्ट्रिय खेलकुद परिषद्का प्रेस सल्लाहकार रोहित दाहालले हालसाल रसियामा कुनै पनि खेलका लागि अनुमति नदिएको बताए । अध्यागमन जाँचका क्रममा ती १४ जना अक्क न बक्क परेका थिए । उनीहरूमध्ये कसैले बेसबल त कसैले फुटबल खेल्न जान लागेको बताएका थिए । नेपाली खेलाडीको नाममा गैरखेलाडीलाई विदेश लैजान खोजिएको यो पहिलो घटना भने होइन । नेपाली खेलकुद क्षेत्रकै केही जिम्मेवार व्यक्तिले गत वर्ष क्रिकेट खेलाउन लैजाने भन्दै ९ गैरखेलाडीलाई जापानमा लगेर लुकाएका थिए ।
क्रिकेटका ९ जना राष्ट्रिय खेलाडीसँगै लगिएका उनीहरूलाई जापानस्थित आफन्तको सहयोगमा लुकाइएको थियो । एन्फाका पूर्वमहासचिव लोकबहादुर शाही दुई महिनाअघि ‘स्पोर्ट्स फर अल' नामको संस्थाबाट विदेश पठाउँछु भन्दै रकम असुलेको आरोपमा पक्राउ परेका थिए । उनी अझै प्रहरी हिरासतमा छन् ।
अध्यागमनले फिर्ता गरेका नक्कली खेलाडीमा ललितपुरका दिनेश बजगाईं, म्याग्दीका रामबहादुर, बुद्धिबहादुर पुर्जा, प्रवेश स्युथानी र राजन स्युथानी, रुपन्देहीका सन्तोष क्षत्री, दोलखाका सञ्जीव केसी, गुल्मीका सन्देश थापा, रामेछापका दिनेश भुजु र दीपक आले, काभ्रेका सानी लामा र छिरिङ तामाङ, दाङका सुमन कुमाल र कैलालीका रितेश विश्वकर्मा छन् ।