सांसदहरूले निर्वाचन क्षेत्र पूर्वाधार विकास कार्यक्रमको नाममा बुझेको रकम दुरुपयोग गरेका छन् । उनीहरूले साइकल किनेर कार्यकर्तालाई बाँड्नेदेखि योग शिविर चलाउनेसम्मका काममा बजेट खर्च गरेका छन् । सभा, सम्मेलन र गोष्ठीमा समेत बजेट खर्च गरिएको महालेखा परीक्षकको कार्यालयले जनाएको छ । यो खबर कृष्ण कट्टेलले आजको नयाँ पत्रिकाबाट लिएका हौ।
सार्वजनिक खरिद नियमावलीअनुसार विकासमा छुट्याइएको रकम वितरणमुखी कार्यक्रम, सभा, सम्मेलन वा गोष्ठीमा खर्च गर्न पाइँदैन । तर, निर्वाचन क्षेत्र पूर्वाधार विकासको बजेटले बारामा १७० र रौतहटमा ३१४ गरी ४८४ साइकल खरिद गरेर वितरण गरिएको छ । यसमा ३४ लाख २८ हजार खर्च गरिएको महालेखा परीक्षकको ५५औँ वार्षिक प्रतिवेदनमा उल्लेख छ ।
जिल्ला समन्वय समिति काठमाडौंले एक सांसदको सांसद विकास कार्यक्रमबाट कोटेश्वरमा उपभोक्ता समितिमार्फत योग शिविर चलाएको छ । जसमा प्रशिक्षण भत्ताबापत ७ लाख २८ हजार, खाना, साउन्ड र त्रिपाल भाडामा ६ लाख ६१ हजार रुपैयाँ खर्च गरिएको छ । त्यस्तै, कागेश्वरी मनोहरामा भाषा र योग शिविरमा ६ लाख ४२ हजारसमेत गरी २० लाख ३१ हजार र कुलेश्वरको योगपार्क निर्माणमा ११ लाख ५० हजारसमेत ३० लाख ७६ हजार खर्च गरिएको छ ।
सार्वजनिक खरिद नियमावलीअनुसार उपभोक्ता समितिले पाएको काम कुनै पनि निर्माण व्यवसायीबाट गराउन मिल्दैन । मकवानपुरमा जिल्ला समन्वय समिति र उपभोक्ता समितिबीच ५ डिप ट्युबेल बोरिङ गर्न ६१ लाख ४५ हजार रुपैयाँमा सम्झौता भएपछि उपभोक्ता समितिले सो काम निर्माण व्यवसायीलाई दिएको छ । दश लाखभन्दा बढीको लागत अनुमान भएको खरिद कार्य बोलपत्रको माध्यमबाट गर्नुपर्ने नियम छ । तर, मकवानपुरमा १० वटा उपभोक्ता समितिले एउटै फर्मबाट विद्युत्को पोल खरिद गरेको बिलको आधारमा १ करोड ८ लाख २५ हजार भुक्तानी भएको छ ।
