रसियामा जारी २१ औं संस्करणको विश्वकप फुटबलको पहिलो क्वार्टरफाइनल खेलमा आज फ्रान्स र उरुग्वे भिड्दै छन्।
क्वार्टरफाइनलसम्म आइपुग्दा उरुग्वेको डिफेन्स उत्कृष्ट देखिएको छ। उसले ‘राउण्ड अफ सिक्सिटन’मा पोर्चुगलसँग १ गोल खाएबाहेक अन्य कुनै टोलीलाई बल आफ्नो गोल पोस्टमा छिराउन दिएको छैन।
अर्कोतर्फ जारी प्रतिगोगितामा फ्रान्स विपक्षीको पोस्ट आक्रमणका लागि माहिर देखिएको छ। उसले अर्जेन्टिनाविरुद्ध नकआउट चरणको खेलमा मात्र ४ गोल गरेको छ। त्यसैले आजको खेल बलियो डिफेन्सविरुद्ध बलियो एट्याकको हुनेछ।
उरुग्वेका एडिसन काभानी आज मैदान उत्रनेमा अन्यौल कायमै छ। पोर्चुगलसँगको खेलका दौरान घाइते भएका काभानीको पिडौँलामा समस्या छ। अग्ला अनि बलिया काभानी र स्वारेजको फरवार्ड जोडीले विश्वकप फुटबलमा हेडलाइन बनाइराखेका छन्।
अर्कोतर्फ फ्रान्समा एम्बाप्पेको उदय भएको छ। अर्जेन्टिनाविरूद्धको खेलमा उनले ब्राजिलका महान फुटबलर पेलेको रेकर्ड बराबर गरेका छन्। १९५८ मा पेलेपछि विश्वकपको एउटै खेलमा दुई गोल गर्ने एम्बाप्पे पहिलो टिनएजर खेलाडी हुन्। एम्बाप्पेलाई रोक्नु फ्रान्सको डिफेन्सको मुख्य चुनौती हुनेछ।
फ्रान्सको आक्रमणको अर्का हतियार एन्टोइन ग्रिजम्यान हुनेछन्। एथलेटिको म्याड्रिडबाट व्यावसायिक फुटबल खेल्ने ग्रिजम्यानको सोही क्लबबाट खेल्ने उरुग्वेका डिफेन्डर डिएगो गोडिन र जोसे जिमिनेजसँग राम्रो सम्बन्ध छ।
उरुग्वे विश्वकपमा छनौट भएपछि ग्रिजमेन उरुग्वेको जर्सी लगाएर साथीहरूको स्वागतका लागि म्याड्रिड विमानस्थल पुगेका थिए।
उरुग्वेका प्रशिक्षक ओस्कार ताबरेजले फ्रान्सको बलियो पक्ष ‘अट्याक’ भएको स्वीकार गरेका छन्। ‘एम्बाप्पे र ग्रिजम्यान रहेको फ्रान्सको बलियो पक्ष नै अट्याक हो’, ताबरेजले भनेका छन्, ‘फ्रान्सलाई मौका छाड्नु वा कुनै ठाउँ छाड्न सकिन्न।’
फ्रान्सका प्रशिक्षक डिडियर देसामले काभानीसहितको उरुग्वेसँग प्रतिष्पर्धाका लागि तयारी गरिरहेको बताएका छन्।
‘काभानी खेल्ने नखेल्ने मलाई पनि ९० मिनेटअगाडि मात्र थाहा हुन्छ। हामीले काभानीसहितको उरुग्वेसँग प्रतिष्पर्धाको तयारी गरेका छौं’, देसामले भनेका छन्, ‘उरुग्वेले समूहगत रूपमा डिफेन्स गर्छ। उनीहरूबीच राम्रो तालमेल छ र यसो गर्न उनीहरू रमाउँछन्।‘
फ्रान्सका खेलाडी राम्रा र सक्षम छन्। अर्कोतर्फ उरुग्वे टिमका रूपमा राम्रो छ।
फ्रान्स र उरुग्वेले विश्वकपमा अहिलेसम्म तीन पटक प्रतिष्पर्धा गरेका छन्। २००२ र २०१० मा गोलरहित बराबरी खेलेका थिए भने १९६७ मा उरुग्वेले फ्रान्सलाई १ कविरूद्ध २ गोलले हराएको थियो।
नकाउटमा भने यो उनीहरूबीचको पहिलो भीडन्त हो।
अन्तिम पटक सन् २०१३ मा भएको मैत्रीपूर्ण खेलमा उरुग्वेले फ्रान्सलाई १-० ले पराजित गरेको थियो।
फ्रान्सले सन् १९८५ मा एकपटक मात्र उरुग्वेलाई पराजित गरेको थियो।
उरुग्वेले आजको खेल जिते उ पाँचौ पटक विश्वकपको सेमिफाइनलमा पुग्नेछ। पछिल्लो समय सन् २०१० मा उरुग्वे सेमिफाइनल पुगेको थियो।
फ्रान्स सन् २००६ देखि यता सेमिफाइनल पुग्न सकेको छैन। सन् २०१४ मा जर्मनीसँग क्वार्टरफाइलनमा फ्रान्स पराजित भएको थियो।
पछिल्ला ९ खेलमा भने फ्रान्स अपराजित छ। जसमध्ये पाँच जित निकालेको छ भने ४ पटक बराबरी खेलेको छ।
एम्बाप्पेले जारी विश्वकपमा तीन गोल गरिसकेका छन्। अर्कोतर्फ ग्रिजम्यानले विश्वकप र युरोपियन च्याम्पियन्सिपका पछिल्लो पाँच नकआउट चरणको खेलमा ६ गोल गरेका छन्। तर उनी जारी विश्वकपमा गोल गर्न चुकिरहेका छन्। रसियामा उनले १२ पटक पोस्टमा प्रहार गर्दा दुई गोल गरेका छन्। तर ग्रिजम्यानले गोल गरेको हरेक खेलमा फ्रान्स अपराजित छ।
उरुग्वेसँग भिड्न फ्रान्सलाई ‘फिजिकल्ली’ भने सहज छैन। फ्रान्सले खेलअघि ट्याक्टिकल मुभकोसमेत प्राक्टिस गरेको छ।
खेल नोभोगाद रंगशालामा साँझ पौने ८ बजे सुरू हुनेछ।