रसियामा जारी २१औं संस्करणको विश्वकप फुटबलमा सेमिफाइनल प्रवेशका लागि रसिया र क्रोएसिया खेल्ने भएका छन्।
आइतबार रातिको पहिलो खेलमा रसिया र दोस्रोमा क्रोएसिया विजयी भएसँगै अब उनीहरूको क्वार्टरफाइनलको भेट पक्का गरेका हुन् ।
आइतबारको दुबै खेलको नतिजा पेनाल्टी सुटआउटमा गरिएको थियो। दोस्रो खेलमा क्रोएसियाले डेनमार्कलाई ३–२ ले हराएको थियो भने पहिलो खेलमा घरेलु टोलीले स्पेनको चुनौती ४-३ ले समाप्त पारेको थियो।
दुबै खेलमा किपरको उत्कृष्ट प्रदर्शन थियो। दोस्रो खेलमा नाटकीय रहेको पेनाल्टी सुटआउटमा क्रोएसियालाई क्वार्टरफाइनल पुर्याउन गोलकिपर डेनियल सुबेसिचले उत्कृष्ट प्रदर्शन गरे। उनले पाँच मध्ये तीन पेनाल्टी बचाएका थिए। चार जनाले पेनाल्टी प्रहार गर्दासम्म २–२ गोलको स्थितिमा रहेको खेलमा क्रोएसियाका ईभान राकिटिचले गोल गर्दै क्रोएसियालाई विजयी गराए।
खेलको अतिरिक्त समयको अन्तिम समयमा क्रोएसियाले पेनाल्टी पाए पनि गोल गर्न नसक्दा पेनाल्टी सुटआउटबाट निर्णय गर्नुपरेको थियो। कप्तान लुका मोड्रिचले प्रहार गरेको पेनाल्टी डेनमार्कका गोलकिपर क्यास्पर सेमाइकलले बचाएका थिए ।
नोभ्गोरोड स्टेडियममा खेल सुरु भएको चार मिनेटमै २ गोल भए पनि बाँकी १ सय १६ मिनेटसम्म दुवै टोलीले गोल गर्न सकेनन्।
खेलको पहिलो मिनेटमै माटिस होर्गेनसनले गोल गर्दै डेनमार्कलाई सुरूवाती अग्रता दिलाएका थिए। तर, चौथो मिनेटमै मारियो मान्जुकिचले गोल गर्दै खेल बराबरीमा ल्याएका थिए।
पेनाल्टीमा दुवै टिमका सुरुका एक एक प्रहार किपरले बचाएका थिए । डेनमार्कका क्रिष्टियन इरिक्सन र क्रोएसियाका मिलान बादेलको प्रहार गोलकिपरले बचाएका थिए । त्यसपछि डेनमार्कका सिमाने कार र माइकल क्रोन तथा क्रोएसियाका अन्द्रे क्रामारिक र लुका मोड्रिचले गोल गर्दा खेल २–२ को स्थितिमा पुग्यो ।
त्यसपछि डेनमार्कका लास्से सोन र क्रोएसियाका जोसिप पिभारिकको प्रहार पनि गोलकिपरले विफल बनाए । निकोलाई योर्गेनसनको पाँचौं पेनाल्टी गोलकिपर सुबेसिचले बचाए । तर इभान राकिटिचको पाँचौं पेनाल्टी गोलमा परिणत भएपछि क्रोएसिया क्वार्टरफाइनलमा पुगेको हो ।