विश्वकप फुटबलको नकआउट चरणको आजको दोश्रो खेलमा डेनमार्क र क्रोएसिया भिड्दैछन्।
पछिल्लो १८ खेलमा अपराजित रहेको डेनमार्कविरुद्ध क्रोएसिया आज इतिहास दोहोर्याउने दाउमा छ।
सन् २००४ पछि दुई मुलुक पहिलो पटक आमनेसामने हुन लागेक हुन्। त्यो मैत्रीपूर्ण खेलमा क्रोएसियाले डेनमार्कलाई २-१ ले पराजित गरेको थियो।
समूह चरणका तीन वटै खेलमा जित निकालेको क्रोएसियाले अर्जेन्टिनाविरुद्ध ३-० को नतिजा निकालेको थियो भने नाइजेरियाविरुद्ध २-० को जीत दर्ता गराएको थियो। त्यस्तै आइसल्याण्डलाई २-१ ले पराजित गरेको थियो। आइसल्याण्डविरुद्धको समूह चरणको अन्तिम खेलमा ९ खेलाडीलाई आराम दिँदासमेत क्रोएसियाले २-१ ले जित हात पारेको थियो।
रसिया विश्वकपमा क्रोएसिया बलियो राष्ट्रको रूपमा उदाएको छ। युरोपियन राष्ट्रहरूविरुद्ध क्रोएसियाले विश्वकपमा राम्रो प्रदर्शन गर्दै आएको छ। ६ वटा युरोपियन टोलीसँगको खेलमा उसले ५ जित निकालेको छ। विश्वकपको तयारीका लागि ६ वटा मैत्रीपूर्ण खेल खेलेको क्रोएसियाले ५ वटामा जित निकालेको छ। उसले ब्राजिलसँगको खेल भने २-० ले गुमाएको थियो।
अर्कोतर्फ समूह चरणमा डेनमार्कले पनि कुनै खेल गुमाएको छैन। अष्ट्रेलिया र फ्रान्ससँग डेनमार्कले बराबरी खेलको थियो। फ्रान्सविरुद्ध गोलरहित बराबरी खेलको डेनमार्कले अष्ट्रिलियासँग १-१ को बराबरी खेलको थियो। पेरुलाई भने १-० गोलअन्तरले पराजित गरेको थियो।
डेनमार्कका गोलकिपर कास्पर स्माइकल उत्कृष्ट फर्ममा छन्। उनले समूह चरणमा डेनमार्कको पोस्टमा प्रहार भएका १३ मध्ये १२ वटा प्रहार रोकेका छन्। उनले अष्ट्रेलियाविरुद्ध एक मात्र गोल पनि पेनाल्टीमा खाएका हुन्। तर जारी विश्वकपमा डेनमार्कले राम्रो फिनिसिङ गर्न सकेको छैन। क्रोएसियाविरुद्ध डेनमार्कका मिडफिल्डर क्रिष्टेन इरिक्सनको प्रदर्शन महत्वपूर्ण हुनेछ।
जारी विश्वकपमा सबैभन्दा धेरै अर्थात् मैदानमा उनी ३६ किलोमिटर दौडिसकका छन्। पटक पटक विपक्षीको गोलपोस्टमा प्रहार गर्ने एकमात्र खेलाडी इरिक्सन हुन्। टोटनह्याम हस्परबाट व्यावसायिक फुटबल खेल्ने इरिक्सनले चार पटक गोलपोस्टमा प्रहार गरेका छन्। पछिल्लो १६ अन्तर्राष्ट्रिय खेलमा इरिक्सनले डेनमार्कका लागि १३ गोल गरेका छन् भने पाँच पटक गोलका लागि सहयोग गरेका छन्। यो विश्वकपमा उनले अष्ट्रेलियाविरुद्ध एक गोल गरेका छन्।
अर्कोतर्फ क्रोएसियाका लागि आज रियल मेड्रिडका खेलाडी लुका मड्रिकको प्रदर्शन महत्वपूर्ण हुनेछ। सानो ज्यानका कारण उनीमाथि पटक पटक प्रश्न उठ्ने गरेका छन्। तर हरेक पटक उनले आफ्नो प्रदर्शनबाट जवाफ दिँदै आएको छ।
टोटनह्यामबाट रियल म्याड्रिडको यात्रा, चार पटक च्याम्पियन्स लिगको उपाधि अनि जारी विश्वपकको प्रदर्शन हरेक पटक लुका मड्रिकले आफूलाई पुष्टि गर्दै अएका छन्। उनले जारी विश्वकपमा समेत दुई गोल गरिसकेका छन्। नाइजेरियाविरुद्ध पेनाल्टीमा गोल गरेका मड्रिकले अर्जेन्टिनाविरुद्ध ३० यार्डबाट प्रहार गरेर गोल गरेका थिए।
फ्रान्सविरुद्ध पूरै समय रक्षात्मक खेलेको डेनमार्कले आज आक्रामक प्रदर्शन गर्ने जनाएको छ। अर्कोतर्फ उत्कृष्ट फर्ममा रहेको क्रोएसिया बलियो स्थितिमा छ। क्रोएसियाका मिडफिल्डर आइभर राकाटिकले डेनमार्कविरुद्धको खेलअघि नयाँ इतिहास लेख्नका लागि रसिया आएको प्रतिक्रिया दिएका छन्।
डेनमार्कका मिडफिल्डर थोमस डिलेनीले टिकी टाका खेलेर ५-० हार बेहोर्न रसिया नआएको बताएका छन्। 'मानिसहरुलाई डेनमार्कले फ्रान्सविरुद्ध जस्तो रक्षात्मक खेलेको हेर्ने बानी थिएन', डिलेनीले भनेका छन्, 'त्यो आवश्यकता थियो। तर क्रोएसियाविरुद्धको खेल पूर्णत: फरक र चाखलाग्दो हुनेछ।
खेल नेपाली समय अनुसार राति पौने १२ बजे नोभगार्ड रंगशालामा हुनेछ।
