पोर्चुगलका कप्तान क्रिष्टियानो रोनाल्डोले तत्काल अन्तर्राष्ट्रिय फुटबलबाट शन्यास नलिने संकेत गरेका छन्। शनिबार राति भएको विश्वकपको अन्तिम १६ को दोस्रो खेलमा उरुग्वेसँग २–१ ले पराजित भएपछि आफ्नो सञ्चारकर्मीसँग कुरा गर्दै उनले भविष्यका बारेमा चर्चा गर्न अस्वीकार गरेका हुन्।
अन्तर्राष्ट्रिय फुटबलको लगभग अन्त्यमा रहेका उनी विश्वकपबाट बाहिरिएपछि अन्तर्राष्ट्रिय फुटबलबाट सन्यास लिन सक्ने अनुमान गरिएको थियो ।
तर रोनाल्डोले भने अहिले नै अन्तर्राष्ट्रिय फुटबलबाट सन्यास नलिने संकेत गरेका छन्। उरुग्वेसँगको खेलपछि रोनाल्डोले भने, ‘यो समय खेलाडी वा प्रशिक्षकको भविष्यका बारेमा कुरा गर्ने उपयुक्त समय होइन ।’
पोर्चुगलले आफूलाई विश्वको उत्कृष्ट मध्ये एक टिमका रुपमा कायम राख्ने भन्दै उनले भने,‘हामीसँग उत्कृष्ट समूह, भविष्यलाई हेर्न सक्ने युवा खेलाडी छन् । मेरो विचार टिम बलियो रहिरहने छ।’
उरुग्वेविरुद्ध राम्रो खेल्दा खेल्दै पनि आफ्नो टिमले जित्न नसके भन्दै उनले उरूग्वे भन्दा राम्रो खेले पनि जसले गोल गर्छ, उसले जित्ने भएकाले हामी पराजित हुनुपरेको बताए।
पोर्चुगलका प्रशिक्षक फरनान्डो सान्तोसले यसअघि रोनाल्डोले फुटबलमा अझै धेरै दिन बाँकी रहेको बताएका थिए। तर, रोनाल्डोले आफ्नो भविष्यका बारेमा केही खुलाएनन्। कतार विश्वकपमा उनी ३७ वर्षका हुनेछन्।
यसैबीच सान्तोसले पनि रोनाल्डोका बारेमा खुलेर प्रशंसा गरे। कप्तान रोनाल्डोले पोर्चुगिच फुटबलका लाग अझै धेरै समय दिनुपर्ने बताए।
उनले आगामी सेप्टेम्बरमा हुने युइएफए नेशन्स लिग मा रोनाल्डो टिममै रहने आशा राखेका छन्।
