फ्रान्स रसियामा जारी २१ औं संस्करणको फिफा विश्वकप फुटबलको क्वार्टर फाइनलमा प्रवेश गरेको छ।
उपाधिको बलियो दाबेदार अर्जेन्टिनलाई ४-३ गोल अन्तरले हराउँदै फ्रान्स अन्तिम ८ मा प्रवेश गरेको हो।
फ्रान्सलाई जिताउन एम्बापेले २ तथा ग्रिजम्यान र पाभार्डले १-१ गोल गरे। अर्जेन्टिनाका लागि डि मारिया र मेराकाडोले गोल गरेका थिए।
पहिलो पटक अर्जेन्टिनासँग अन्तिम १६ मा भिडेका फ्रान्सले शनिबार कजान रंगशालमा १३औं मिनेटमा पेनाल्टीमार्फत गोल गर्दै खेलमा अग्रता लिएको थियो।
केलियन एमबाप्पेलाई डिबक्समा लडाएपछि फ्रान्सले पेनाल्टी पाएको थियो। एन्टोनी ग्रिजम्यानले पेनाल्टीमार्फत फ्रान्सलाई अग्रता दिलाएका थिए।
खेलको ४१ औं मिनेटमा डि मारियाले उत्कृष्ट गोल गर्दै अर्जेन्टिनाका लागि बराबरी गोल फर्काएका थिए।
एभर वेनेगाले उपलब्ध गराएको पासमा उनले करिब ३० यार्ड टाढाबाट बायाँ खुट्टाले शशक्त प्रहार गर्दै गोल गरेका थिए।
पहिलो हाफसम्म १-१ गोलको बराबरीमा रहेको खेलको दोस्रो हाफको सुरूवातमै अर्जेन्टिनाले गोल गर्दै खेलमा अग्रता लियो।
४८ औं मिनेटमा अर्जेन्टिनाले ग्याबरियल मेकाडोले गोल गर्दै अर्जेन्टिनी टोलीलाई २–१ को स्थितिमा पुर्याएका थिए। तर, खेलको ५७ औं मिनेटमा बेन्जामिन पाभार्डले गोल गर्दै खेललाई २–२ को स्थितिमा ल्याएका थिए।
त्यसपछि चार मिनेटको अन्तरमा दुई गोल गर्दै एम्बापेले फ्रान्सलाई अग्रता दिलाए। उनले ६३ औं र ६९ औ मिनेटमा गोल गर्दै फ्रान्सलाई सहज स्थितिमा पुर्याएका हुन्।
त्यसपछि अर्जेन्टिनाले पाएका केही राम्रा मौकामा गोल गर्न नसक्दा पूर्व उपविजेता अन्तिम १६ बाटै घर फर्किएको छ।
मेसीको विश्वकप जित्ने सपना अधुरै
सन् २०१६ मा अमेरिकामा भएको कोपा अमेरिकी कपको फाईनलमा पराजित भएपछि अर्जेन्टिनी कप्तान मेसीले अन्तर्राष्ट्रिय फुटबलबाट सन्यासको घोषणा गरेका थिए।
स्पेनिस क्लब बार्सिलोनबाट व्यवसायिक फुटबल खेल्दै आएका मेसीका अगाडि आउदै गरेको विश्वकप २०१८लाई मध्यनजर गर्दै फ्यानहरूको विशेष आग्रहमा सन्यास फिर्ता लिए।
अर्जेन्टिनाको जर्सीमा पुनः मैदानमा फर्किएका मेसीले कठिन मोडमा रहेको अर्जेन्टिनालाई रसिया विश्वकपसम्मको यात्रामा लगे।
करियरकै उत्तार्धमा रहेका उनले आफ्नो जन्मदिनको दिन घोषणा गरे- विश्वकपको उपाधि जितेर मात्र सन्यास लिन्छु।
त्यही सपनालाई रूस विश्वकपको समूह चरणको अन्तिम खेलमा भाग्यले साथ दिएर दोस्रो चरणसम्मको यात्रा तय भयो।
प्रतियोगितामा डेब्यु गरेको आईसल्याण्डसंग १–१ को बराबरी खेल्यो । दोस्रो खेलमा अर्जेन्टिना क्रोएसियासंग ३–० ले स्तब्ध बन्यो ।
धेरैलाई त्यही समय लाग्यो अर्जेन्टिनाको यात्रा लामो रहने छैन । तर तेस्रो खेलमा नाईजेरियालाई २–१ ले पराजित गर्दै अर्जेन्टिनाले अन्तिम १६ मा यात्रा तय गरेको थियो ।
अन्तिम १६ मा शनिबार राति विश्वकपको दाबेदार फ्रान्सले ४-३ गोल अन्तरमा हराउँदै मेसी र अर्जेन्टिनाको सपना चनाचुर पार्यो।
नतिजाले अर्जेन्टिनालाई घरको बाटो देखाएको छ । विश्वकप जित्ने मेस्सीको सपनामा पूर्णविराम लगाएको छ ।
हेर्नुहोस् मेसीको अर्जेन्टिनाले आज कस्तो खेल्यो