रसियाको कजान रंगशालामा चलिरहेको कोलम्बिया तथा पोल्यान्डबीचको खेलमा कोलम्बिया अग्रता लिएको छ।
सुरूबाट नै एकअर्का विरूद्ध आक्रमक रूपमा उत्रेका उनीहरूबीचको खेलमा कोलम्बियाले खेलको ४० औं मिनेटमा अग्रता कायम गरेको हो। कोलम्बियाका लागि ऐरि मिनाले हेड मार्फत गोल गरेका हुन्।
कोलम्बियाका अग्ला खेलाडी मध्येका एक मिनाले आफ्नो हाइटको सदुपयोग गर्दै कर्नरबाट प्राप्त अवसरलाई गोलमा परिवर्तन गर्दै कोलम्बियाको अग्रता कायम गरेका हुन्। २३ वर्षिय डिफेन्डर मिनाको देशका लागि तेश्रो अन्तराष्ट्रिय गोल हो।
आजको खेलमा कुनै पनि टोलीका लागि हार भनेको समूहचरणबाट नै घर फिर्ती हुनु हो। आज नै भएको खेलमा बराबरीको नतिजामा खेल दुङ्ग्याउँदै समान ४-४ अंक हासिल गरेका कारण जापान र सेनेगल दोश्रो चरणका लागि बलियो अवस्थामा रहेका छन्। त्यसैले पोल्यान्ड र कोलम्बियाका लागि आज र समूह चरणको बाँकी एक खेलमा जीत निकाल्नैपर्ने दबाब छ।
पहिलो हाफको समाप्तीसँग गोल गरेका कारण यो दौडमा कोलम्बिया अगाडी देखिएको छ। दोश्रो हाफ बाँकी नै रहेकाले नजिता उल्टिने पनि उत्तिकै सम्भावना छ।
समूह चरणको पहिलो खेलमा कोल्म्बिया पेनाल्टीमा जापानसँग पराजीत भएको थियो भने पोल्यान्ड सेनेगलसँग १-२ गोलले पराजीत भएको थियो।