दोश्रो चरणमा प्रवेश गर्ने बलियो सम्भावना बनाएर आज एकअर्काबीच भिडेका सेनेगल र जापानबिचको खेल रोचक रह्यो। खेल २-२ गोलको नतिजामा टुङ्गिएको छ।
समूहमा कमजोर आँकिएका अफ्रिकी राष्ट्र सेनेगल र एसियाली देश जापानले समूह चरणको खेलमा बलिया मानिएका देशहरू क्रमश: पोल्यान्ड र कोलम्बियालाई पराजीत गर्दै सबैलाई आश्चर्यमा पारिदिएका उनीहरू जित निकाल्ने लक्ष्यका साथ आज मैदानमा आएका थिए।
निक्कै नै रोमाञ्चक मुसा बिरालोको शैलीमा चलेको आजको प्रतिष्पर्धातमक खेलमा सेनेगलले खेलको ११ औं मिनेटमा अग्रता कायम गरेको थियो। सो गोल १० नम्बर जर्सी लगाएका साडियो मानेले हानेका थिए।
गोल खाएर पछि परे पनि जापान ३४ औं मिनेटमा बराबरी गोल फर्काउँदै खेलमा फर्कियो। सो बराबरी गोल जापानका इनउइले गरे।
पहिलो हाफ बराबरीमा सकिएको खेलको दोश्रो हाफ पनि प्रतिष्पर्धात्मक रह्यो। सेनेगलले खेलको ७१ औं मिनेटमा गोल गर्दै फेरि अग्रता लियो।सेनेगलका लागि दोश्रो गोल सेनेगलका १९ वर्षिय वागेले गरे। सेनेगलका लागि यो उनको पहिलो अन्तराष्ट्रिय गोल थियो।
दोश्रो गोल खाएपछि जापान दबाबमा पर्यो तर सो दबाब उसले धेरै बेर झेल्नुपरेन। जापानका स्टार खेलाडी केसुके होन्डाले आफ्नो ३७ औं अन्तराष्ट्रिय गोललाई जापानको बराबरी गोल बनाए। खेलको ७८ औं मिनेटमा उनले सो बराबरी गोल फर्काउँदै जापानलाई फेरि लयमा ल्याउने काम गरे।
एक अर्काको पोस्टमा खेल अवधिभर निरन्तर आक्रमण गरेका जापान र सेनेगलले सो क्रममा केहि महत्वपूर्ण अवसर गुमाएका थिए।
बराबरीसँगै समूह 'एच'मा जापान र सेनेगलको एक जीत र बराबरी सहित समान ४ अंक भएको छ। उनीहरूको बराबरीले समूह चरणको पहिलो खेल हारेका पोल्यान्ड र कोलम्बियामाथि दबाब चर्को थपिएको छ।