डिफेन्डिङ च्याम्पियन जर्मनीसहित बलिया प्रतिद्वन्द्धी ब्राजिल,स्पेन, पोर्चुगल तथा अर्जेन्टिनाको विश्वकपमा नकआउट चरण प्रवेश रोमाञ्चक मोडमा पुगेको छ।
जारी विश्वकप फुटबलमा एक जित र एक बराबरी भएको स्पेन, पोर्चुगल र ब्राजिल तथा एक जित हात पारेको जर्मनीको दोस्रो चरण प्रवेश रोमाञ्चक मोडमा पुगेको हो।
जर्मनी रहेको समूह समूह एफको समिकरण रोचक बनेको छ। मेक्सिको ६ अंक सहित शीर्ष स्थानमा रहँदा जर्मनी र स्विडेनको समान ३–३ अंक छ। समूहको अन्तिम खेल नसकिँदासम्म अघिल्लो चरण पुग्ने टोलीको टुंगो नलाग्ने भएको हो।
मेक्सिकोले स्विडेनसँग बराबरी मात्र खेले पनि अघिल्लो चरण पुग्नेछ तर स्विडेन विजयी भए र अर्को खेलमा जर्मनीले कोरियालाई हराए गोल अन्तरका आधारमा अर्को चरण पुग्ने २ टोलीको छिनोफानो हुनेछ। जर्मनीलाई कोरियाले हराएको अवस्थामा भने स्विडेनले मेक्सिकोलाई हराएपनि मेक्सिको अन्तिम १६ मा पुग्नेछ ।
यस्तै, कोरियाले जर्मनीलाई हराए र मेक्सिकोले स्विडेनलाई हराए कोरिया पनि अर्को चरणमा पुग्नसक्छ। तर यसका लागि कोरियाले जर्मनीलाई फराकिलो गोल अन्तरले हराउनुपर्छ भने मेक्सिकोले पनि स्विडेनलाई फराकिलै अन्तरले हराउनुपर्नेछ।
समूहको अन्तिम खेलमा मेक्सिकोले स्वीडेनसँग र जर्मनीले दक्षिण कोरियासँग खेल्नेछन् ।
यस्तै समूह ई मा एक जित र एक बराबरीसहित स्विटजरल्याण्ड र ब्राजिलको समान ४-४ अंक छ। तेस्रो स्थानमा रहेको सर्बियाको ३ अंक छ। यो समूहमा पनि अन्तिम खेलपछि मात्र नकआउट चरण पुग्ने टोलीको टुंगो लाग्नेछ। यो समूहबाट कोष्टारिका बाहिरिसके पछि अब अन्तिम खेलमा ब्राजिलले सर्बियालाई हराए वा बराबरी गरे पनि दोस्रो चरणमा पुग्नेछ। तर सर्बियालाई दोस्रो चरण पुग्न जित्नै पर्नेछ। यस्तै स्विटजरल्याण्डले कोष्टारिकालाई हराए या बराबरी गरे दोस्रो चरण पुग्नेछ।
समूह ई जस्तै समूह बी पनि रोमाञ्चक मोडमा छ। स्पेन र पोर्चुगल १ खेलमा जित र एक बराबरीसहित समान ४-४ अंक लिएर अगाडि छन्। एसियाली राष्ट्र इरान ३ अंकसहित नकआउट चरणको दौडमा आएको छ। यस समूहबाट मोरक्को आउट भइसेकको छ। यस्तो अवस्थामा अब अन्तिम खेलले अन्तिम १६ मा पुग्ने टोलीको टुंगो लगाउनेछ।
पहिलो खेलमा इरान र पोर्चुगल भिड्नेछन्। यो खेलमा जसले जित्छ उ नकआउट चरणमा पुग्नेछ। यदि बराबरी भएमा पोर्चुगल दोस्रो चरणमा पुग्नेछ।
अर्को खेलमा मोरक्कोलाई हराए स्पेन दोस्रो चरणमा पुग्नेछ। तर, मोरक्कोसँग हारेमा पोर्चुगलले इरानलाई हराए उ उपविजेता हुँदै नकआउट चरण पुग्नेछ।
समूह डीबाट क्रोएसिया अन्तिम १६ मा पुगिसकेको छ।
अब अन्तिम चरणको खेलपछि नाइजेरिया, आइसल्याण्ड र अर्जेन्टिना मध्ये एक टोलीले अन्तिम १६ मा स्थान बनाउने छन्।
आइसल्याण्डविरुद्ध नाइजेरियाले निकालेको २-० को जितले अर्जेन्टिनालाई फाइदा पुगेको छ। यो खेलमा नाइजेरिया हारेको खण्डमा अर्जेन्टिना समूह चरणबाट बाहिरिने पक्का थियो। तर, यो खेल नाइजेरियाले जितेसँगै अर्जेन्टिनाको दोस्रो चरण पुग्ने सम्भावना थप बलियो भएको छ।
यो समूहमा समान खेलबाट आइसल्याण्ड र अर्जेन्टिनाको समान १-१ अंक छ। अब नाइजेरियाले अन्तिम खेलमा अर्जेन्टिनासँग खेल्ने छ। उक्त खेलमा जित निकाले नाइजेरियाले अन्तिम १६ मा स्थान बनाउने छ। बराबरी खेले क्रोएसिया र आइसल्याण्डबीचको खेलको नतिजामा भर पर्नुपर्ने हुन्छ।
अन्तिम खेलमा नाइजेरिया पराजित भए र क्रोएसियाले आइसल्याण्डलाई हराएमा अर्जेन्टिनाले अन्तिम १६ मा स्थान पक्का गर्नेछ।
आइसल्याण्डले क्रोएसियालाई हराएमा अर्जेन्टिनाले अर्को चरणको यात्रा केही कठीन हुन्छ।
