जारी विश्वकपमा डिफेन्डिङ च्याम्पियन जर्मनीलाई १-० ले हराएको मेक्सिकोका कप्तान हुन राफेल मार्खेज। मार्खेज कप्तानसँगै पाँच पटक विश्वकप खेल्ने मेक्सिकन खेलाडी पनि हुन्।
मेक्सिकोको छिमेकी संयुक्त राज्य अमेरिकाले भने मार्खेजलाई कालोसूचीमा राखेको छ। लागुऔषध कारोबारीलाई सघाएको अभियोगमा अमेरिकाको ट्रिजरी डिपार्टमेन्टले गत अगस्टमा मार्खेजलाई कालोसूचीमा राखेको हो।
राफा उपनामले प्रसिद्ध ३९ वर्षिय मार्खेजसँग कुनै पनि अमेरिकी बैंक, वित्तिय संस्था, कम्पनी र व्यक्तिले कारोबार गर्न डिपार्टमेन्टले बन्देज लगाएको छ। अमेरिका रहेको र मेक्सिकोमा अमेरिकी आर्थिक प्रणालीसँग जोडिने उनको सम्पत्ति रोक्का गरिएको छ।
यसले उनको दैनिकीदेखि खेलमा पनि प्रभाव पारेको छ। कतिसम्म भने उनका अन्य सहकर्मीले पिउने अमेरिकी ब्रान्डको पानी पनि उनी पिउन पाउँदैनन् नत अभ्यास खेलमा अरूले लगाएको जस्तै युनिफर्म लगाउन सक्छन्।
विश्वकपमा उनले राम्रो प्रदर्शन गरे पनि उनी म्यान अफ द म्याच घोषित हुने सम्भावना हुँदैन। उनको बसाइ पनि कुनै अमेरिकी सम्बन्धित हुनसक्ने ठाउँभन्दा अलग्गै छानिएको छ।
यसअघि विश्व फुटबल महासंघ (फिफा)ले विश्वकपका लागि मेक्सिकोले पाउने १५ लाख डलर पनि अमेरिकी आर्थिक प्रणालीसँग सम्बन्ध नभएका बैंकमार्फत् पठाएको थियो।
अमेरिकाका प्रायोजक जो विश्वका स्टार खेलाडीलाई प्रायोजन गर्छन् उनीहरूबाट पनि मार्खेज टाढै बस्नुपर्छ।
मार्खेजले भने लागुऔषध कारोबारीलाई सघाएको भन्ने अमेरिकी आरोप अस्वीकार गर्दै आएका छन्।
-1746009348.jpg)
