विश्वकप फुटबल खेल्न रूस पुगेका क्रोएसियाका फरवार्ड निकोला कलिनिकलाई घर फर्काइएको छ।
विश्वकप खेल्ने अन्तिम २३ सदस्या रहेका निकोला विश्वकपको पहिलो खेलबाटै घर फर्काइएको हो।
निकोला चोटका कारण घर फर्किएका हुन्। उनको ढाडको समस्या बल्झिए पछि उनी घर फर्किएका हुन्। निकोला घर फर्किएसँगै क्रोएसियासँग विश्वकपमा २२ खेलाडी रहने छ ।
इटालियन क्लब एसी मिलानबाट व्यवसायिक फुटबल खेल्ने ३० वर्षीय निकोलाले नाइजेरियाविरुद्धको खेलमा मैदान पस्ने तयारी गरेपनि ढाडमा समस्या आउदा मैदान छिरेका थिएनन्। निकोलाले क्रोएसियाका लागि ४१ खेलमा १५ गोल गरिसकेका छन् ।
क्रोएसियाका प्रशिक्षक ज्लाट्को डेलीकले उनको यो समस्या इंग्ल्यान्डमा भएको ब्राजिलबिरुद्धको मैत्रीपूर्ण खेलमा समेत देखिएको बताए ।
उनले आफ्नो खेलाडीहरु फिट हुनुपर्ने र खेल्न तयार हुनुपर्ने बताएका छन्।
'नाइजेरियाविरुद्ध निकोलाले वार्म अप गरिरहेका थिए। उनको दोस्रो हाफमा मैदान आउने तयारी थियो। तर, ढाडको समस्याका कारण उ मैदान पस्न तयार थिएनन्,' प्रशिक्षक ज्लाट्कोले भने, 'म मेरा खेलाडी पूर्ण फिट र खेलको लागि तयार भएको चाहन्छु । त्यसैले मैले यो निर्णय गरे ।'
विश्वकपको आफ्नो पहिलो खेलमा क्रोएसियाले नाइजेरियासँगको पहिलो खेलमा २ – ० को जित निकालेको थियो।
कालिनिकको स्थानमा अब अर्को खेलाडी राख्न पाउने छैन र क्रोएसियाले २२ खेलाडीबाटै बाँकी रहेको खेल खेल्नुपर्नेछ।
-1746009348.jpg)
