रसियामा जारी विश्वकप फुटबलअन्तर्गत आज पाँचौ दिन १२ औं खेलमा समूह ‘एफ’ बाट स्वीडेन र दक्षिण कोरिया खेल्दैछन्। निजहनी नोभगोरोड रंगशालामा नेपाली समय अनुसार साँझ ५:४५ बजे हुने खेल हुनेछ ।
११ पटक विश्वकप खेलिसकेको स्वीडेन एक पटक उपविजेतासमेत बनेको छ। १० औं पटक विश्वकप खेल्न लागेको एसियाली महारथि दक्षिण कोरियाले अहिलेसम्म सेमिफाइनलसम्मको यात्रा मात्र गर्न सकेको छ।
अहिलेसम्म स्वीडेन र दक्षिण कोरियाबीच ३ पटक आमनेसामने भएका छन्। जसमध्ये एक खेल स्विडेनले जितेको छ भने २ खेल बराबरीमा टुंगिएको छ। तर विश्वकपमा भने यी दुई टोलीको पहिलो पटक प्रतिस्पर्धा हो।
सन् १९३४ देखि विश्वकप खेल्न थालेको स्वीडेनले अहिलेसम्म ११ पटक विश्वकप खेलिसकेको छ। डेब्यु विश्वकपमै क्वाटरफाइनलसम्म पुगेको स्विडेन जर्मनीसँग पराजित भएर फर्किएको थियो।
सन् १९३८ को विश्वकपमा स्वीडेनले सेमिफाइनलसम्मको यात्रा तय गरेको थियो। उसले सेमिफाइनलमा हंगेरीसँग पराजित भएर फर्किएको थियो।
सन् १९५० को विश्वकपमा पनि सेमिफाइनलसम्मको यात्रा गरेको उसले उरूग्वेसँग पराजित हुँदै फर्किएको थियो।
सन् १९५८ को विश्वकप आयोजनासमेत गरेको स्वीडेनले घरेलु विश्वकपमा उपाधि नजिक पुगेको थियो। फाइनलमा ब्राजिलसँग पराजित हुँदै उपविजेतामा सिमित हुनु उसको सबैभन्दा ठूलो सफलता हो।
सन् १९९४ मा अमेरिका विश्वकपमा स्वीडेन फेरि सेमिफाइनसम्म पुगेर तेस्रो भएको थियो।
सन् २००२ को विश्वकपमा अन्तिम १६ सम्म पुगेको थियो।
सन् २००६ मा विश्वकपमा पनि अन्तिम १६ सम्म पुगेको थियो।
सन् २०१० र २०१४ को विश्वकपमा छनोट नभएको स्विडेन १२ वर्षको अनुपस्थिति चिर्ने क्रममा यो विश्वकप खेलिरहेको छ।
युरोपेली छनोटको समूह ‘ए’को स्विडेनले दोस्रो स्थानमा बस्दै प्लेअफमा स्थान पक्का गरेको थियो । स्विडेनले प्लेअफमा इटालीलाई १–० ले निराश पार्दै रूस विश्वकपको टिकट काटेको थियो ।
यता दसौं पटक विश्वकप खेल्न लागेको एसियाली महारथि दक्षिण कोरियाले सन् १९५४ मा स्वीट्जरल्याण्डमा भएको विश्वकपबाट डेब्यू गरेको हो।
पहिलो सहभागीतामा समूह चरणबाटै बाहिरिएको कोरियाले अर्को विश्वकप खेल्न ३२ वर्ष कुर्नु परेको थियो।
दक्षिण कोरियाले सन् १९८६ देखि २०१४ सम्म लगातार विश्वकप खेल्दै आएको छ। सन् १९८६, १९९०, १९९४ र १९९८ को विश्वकप खेलेको दक्षिण कोरिया समूह चरणबाटै बाहिरिएको थियो।
सन् २००२ मा घरेलु मैदानमा सम्पन्न विश्वकपमा सेमिफाइनलसम्मको यात्रा तय गरेको दक्षिण कोरिया सन् २००६ को जर्मनी विश्वकपमा फेरि समूहचरणबाटै बाहिरियो।
त्यस्तै सन् २०१० मा अन्तिम १६ सम्मको यात्रा गरेको उसले सन् २०१४ ब्राजिल विश्वकपमा फेरि समूह चरणमै सिमित भयो।
समूहमा विश्वविजेता जर्मनी र मेक्सिको पनि भएकाले स्विडेन र दक्षिण कोरिया सुखद सुरुआतका साथ अन्तिम १६ सम्भावना कायम राख्न चाहन्छन्।
हेर्न लायक खेलाडी
सेबास्टियन लार्सन- स्विडेन
राष्ट्रिय टिमबाट सन् २००८ बाट डेब्यू गरेका सेबास्टियन लार्सन स्विडेनका भरपर्दा मिड्फिल्डर हुन्।
३३ वर्षीय सेबास्टियनले अहिलेसम्म खेलेका एक सय खेलमा ६ गोल गरिसकेका छन्।
मार्कुस बेर्ग- स्विडेन
मार्कुस बेर्ग स्विडेनको अग्रपङ्ती सम्हाल्ने बलिया खेलाडी हुन्। पाएको मौका नगुमाउने उनी फिनिसिङमा अब्बल मानिन्छन्।
सन् २००८ बाट राष्ट्रिय टिममबा डेब्यू गरेका ३१ वर्षीय मार्कुसले अहिलेसम्म खेलेका ५७ खेलमा १८ गोल गरिसकेका छन्।
कि सुङयोइङ- कोरिया
कि सुङयइङ दक्षिण कोरियाली टिम सम्हाल्ने भरपर्दा खेलाडी हुन्। उनले सन् २०१० मा राष्ट्रिय टिमबाट डेब्यू गरेका २९ वर्षीय सुङयोइङले अहिलेसम्म खेलेका १०२ खेलमा १० गोल गरिसकेका छन्।
सन हेउङमिन- कोरिया
दक्षिण कोरियाका फरवार्ड सन हेउङमिन सन् २०११ बाट राष्ट्रिय टोलीमा डेब्यू गरेका हुन्। २५ वर्षीय हेउङमिनले अहिलेसम्म खेलेका ६७ खेलमा २१ गोल गरेका छन्।
टिम स्वीडेन
- फरवार्डः मार्कस बर्ग, जोन गुइडेटी, ओला तोइभेनेन, इस्साक केइसे थेलिन
- मिडफिल्डरः सेबस्टिएन लार्सन, अल्बिन एक्डल, इमाइल फार्सबर्ग, गुस्ताभ स्भेनसन्, ओस्कार हिल्जेमार्क, भिक्टोर क्लाइसन, मार्कस रोहडेन, जिम्मी डुर्माज
- डिफेन्डरः मकाइल लुस्टिग, भिक्टोर लिन्डेलोफ, आन्ड्रेस ग्रान्भिस्ट, मार्टिन ओल्सन, लुड्विग अगस्टिनसन, फिलिप हेलान्डेर, इमाइल क्राफ्थ, पोन्टुस जनसन
- गोलरक्षकः रोबिन ओल्सेन, कार्ल जोहान जोनसन, क्रिस्टोफर नोर्डफेल्डीट
टिम दक्षिण कोरिया
- फवार्ड— किम शिन वोक, सोन हेङ मिन, ह्वाङ हि चान
- मिडफिल्डर – के सुङ युएङ, जङ वो योेङ, जु से जोङ, को जा चेओल, ली जेई सुङ, ली सेयोङ वो, मोन सेओन मिन
- डिफेन्डर— किम योङ ग्वोन, जङ ह्युन सो, जङ सेउङ ह्युन, युन योङ सन, अह बान सुक, किम मिन वु, पार्क जोहो, होङ चुल, गो यो हान, ली योङ
- गोलरक्षक— किम सेयुङ ज्यु, किम जिन हिएओन, छ्यो ह्युन वो