रसियामा जारी फिफा विश्वकप फुटबलअन्तर्गत शुक्रबार दोस्रो दिनको दोस्रो खेलमा मोरक्को र इरानबीच प्रतिस्पर्धा हुँदैछ। सेन्ट पिटर्सबर्ग रंगशालामा भइरहेको खेलको मध्यान्तरसम्म दुवै टिमले गोलरहित बराबरी खेलेका छन्।
मोरक्कोले २० वर्षपछि विश्वकपमा पुनरागमन गरेको हो। यसअघि सन् १९९८ मा फ्रान्समा भएको विश्वकप खेलेयता मोरक्को छनौट भएको थिएन।
सुरुअाती समयमा मोरक्को टिम इरानमाथि हाबी देखिएको छ। मोरक्को टिमले ६३ प्रतिशत समय बल आफ्नो नियन्त्रणमा राखेको थियो भने इरानको बल नियन्त्रण ३७ प्रतिशत रह्यो।
मध्यान्तरसम्म मोरक्कोले ८ चोटि गोल गर्ने प्रयास गर्यो। इरान टिमबाट ६ चोटि प्रयास भयो। बल पास दिनमा पनि मोरक्कोका खेलाडी कुशल देखिएका छन्।
खेलको १९ औं मिनेटमा मोरक्कोको कडा प्रहारलाई इरानका किपरले उत्कृष्ट बचाउ गरेका थिए। २६ औं मिनेटमा मोरक्कोको कडा प्रहारलाई इरानका डिफेन्डरले रोकेका थिए। किपर बिट भइसकेको अवस्थामा डिफेन्डरले उत्कृष्ट बचाउ गरे।
पहिलो हाफको अन्त्यतिर इरानका कडा प्रहारलाई मोरक्कोका रक्षककले बचाउ गरे। खेलको ४३औं मिनेटमा इरानका खेलाडीले वान भर्सेस वान बललाई गोल गर्न सकेनन्।
मोरक्कोका प्रशंसकहरु 'गो गो, वी क्यान डू इट' भन्दै टिमको हौसला बढाइरहेका छन्।
यी दुई टिम पाँचौंपटक आमनेसामने भएका हुन्। यसअघिका चार भिडन्तमध्ये तीनमा मोरक्कोले जीत हात पारेको थियो। अन्तिमपटक सन् २०१४ मा ब्राजिलमा भएको विश्वकप फुटबलमा भने इरानले बाजी मारेको थियो।
यसपटक मोरक्को शक्तिशाली राष्ट्रको रुपमा उदाएको छ। उत्तर अफ्रिकी मुलुक मोरक्कोका अधिकांश खेलाडी युरोपमा जन्मिएर युरोपियन फुटबल खेलेका छन्।
नेदरल्याण्डमा जन्मिएर त्यहीँ व्यवसायिक फुटबल खेल्दै आएका हकिम जियच जस्ता उत्कृष्ट खेलाडी मोरक्कोको टिममा छन्।
त्यस्तै, टर्कीको फुटबल टिम गालातासरेबाट खेल्दै युनिस बेलन्दा पनि मोरक्कोबाट विश्वकप फुटबल खेल्दैछन्। मोरक्कोले सन् २०१२ मा जिम्बाबे र सन् २०१५ मा आइभरी कोस्टलाई अफ्रिकन कप अफ नेसन्समा विजयी बनाएका हर्भ इनार्डलाई कोच बनाएको छ।
मोरक्कोका सबैभन्दा महत्वपूर्ण खेलाडी टर्कीको फेनर्वाचेबाट खेल्ने मिडल्डर नबिल दिरार हुन्।
अर्कोतर्फ इरान विश्वकपका लागि एसियाबाट छनोट हुने पहिलो टोली हो। उज्बेकिस्तानलाई २-० ले हराएर गत वर्ष इरानले विश्वकप सहभागिताको ढोका खोलेको थियो। दुई चरणको विश्वकप छनोटका १८ खेलमा इरान अपराजित रह्यो। यद्यपी उसले ९ खेलमा गोलरहित बराबरीमा चित्त बुझायो।
इरानले सिरिया विरुद्ध २-२ को बराबरी खेलेको थियो। इरानको यो पाँचौ पटकको विश्वकप सहभागिता हो। तर विश्वकपमा भने इरानको प्रदर्शन निराशाजनक छ।
सन् २०१४ मा इरानले कुनै पनि खेलमा जीत हात पार्ने सकेन। यद्यपी यसपटक इरानका पोर्चुगिज कोच कार्लोस कियोरोजले रसिया उड्नु अघि ‘पर्यटक मात्र हुन नजाने’ बताएका थिए।
इरानले यसपटक कम्तिमा नकआउट चरणसम्म पुग्ने लक्ष्य राखेको छ। त्यसका लागि उसले मोरक्कोलाई पराजित गर्नुपर्ने हुन्छ।
समूह बी मा स्पेन र पोर्चुगल जस्ता राष्ट्र छन्। २० वर्षपछि विश्वकप फर्किएको मोरक्कोलाई इरानले आफ्नो अनुभव प्रयोग गरेर जीत दिलाउन सक्छ। तर युवा र युरोपियन खेलाडीले भरिएको मोरक्कोसँगको प्रतिष्पर्धा इरानका लागि सहज पक्कै छैन।
इरानको टोलीमा यसपटक प्रतिभावान खेलाडीहरु छन्। २२ वर्षका रूसको रुबिन कजानबाट खेल्ने सरदार अजमउँ इरानका लागि गोलकर्ताका रुपमा उदाएका छन्। २२ वर्षको उमेरमा उनले २२ अन्तर्राष्ट्रिय गोलसमेत गरिसकेका छन्। सन् २०१५ को एसियन कपमा उनी अन्य मुलुकका लागि चुनौतीका रुपमा खडा भएका थिए।
मोरक्को प्लेइङ ११ -
मुनिर मोहमेदी, असरफ हाकिमी, मेहदी बेनाटिया, रोमेन सइस, हकिम जिच, करिम एल अहमदी, अयुब एल काबी, युनेस बेलहान्दा, बारेक बोसुफा, नोर्दिन अमराबत, अमिन हरित
इरान प्लेइङ ११
अलिरेजा बेरानभान्ड, इशन हाजी सफी, रुजबेह चेसामी, मसुद सोजाइ, मोर्टेजा पौरालिगेन्जी,ओमिद इब्राहिमी, करिम अन्सरीफार्द, वाहिद अमिरी, अलिरेजा जाँहाबक्स, सरदार अजमुन, रमिन रेजाइन
(एजेन्सीको सहयोगमा)
-1746009348.jpg)
