सन् २०२२ को विश्वकप फुटबलमा ४८ देशलाई सहभागिता गराउने विषय अनिश्चित बनेको छ।
हाल विश्वकपमा ३२ राष्ट्र सहभागी छन्।
विश्व फुटबल महासंघ (फिफा)ले यसअघि सन् २०२२ मा कतारमा हुने विश्वकप फुटबलमा ४८ देशलाई सहभागी गराउने तयारी गरिरहेको थियो। तर विश्वकप फुटबल प्रतियोगिता सुरू हुनुअघि रुसमा बसेको फिफाको वार्षिक बैठकमा ४८ राष्ट्रको सहभागिताको विषय कार्यसूचीबाट हटाइएको हो।
यसअघि फिफाको वार्षिक बैठकमा ४८ राष्ट्रको सहभागिता गराउन अध्ययन गर्ने विषय कार्यसूचीमा समेटिएको थियो। कतार विश्वकपका प्रमुख हसन अल थवाडीले तयारीमा केही ढिलाइ भएको फिफा बैठकमा बताएका थिए।
फिफाका अध्यक्ष जियानी इन्फ्यान्टिओले यसअघि ४८ राष्ट्रलाई सहभागी गराउने विषयमा उल्लेख गरेका थिए। तर, उनले कतार विश्वकपको तयारी पछाडि धकेलिएको उल्लेख गर्दै १६ राष्ट्र थप गर्ने विषयमा शंका व्यक्त गरेका हुन्।
सन् २०२२ को विश्वकपमा कति राष्ट्र रहने भन्ने तय फिफाको बैठकले गर्दछ। हाल फिफामा विश्वका २ सय ११ राष्ट्र सहभागी छन्।
‘फिफाको बैठकले नै निर्णय लिने हो’, इन्फ्यान्टिओले भने, ‘तर यो निर्णय लिनुअघि आयोजक कतारको सहमति आवश्यक छ। यो पूर्वसर्त हो।‘
