तीन महिनापछि मैदान फर्किएका ब्राजिलका स्टार नेइमारको उत्कृष्ट प्रदर्शनले विश्वकपको दाबेदार ब्राजिलले क्रोएसियालाई २-० ले हराएको छ।
लिभरपुलको घरेलु मैदान एनफिल्डमा भएको खेलमा ब्राजिलका समर्थकको चिन्तालाई तोड्दै नेइमारलाई खेलको ६९औं मिनेटमा आकर्षक गोल गरेका हुन्।
घाइते भएर तीन महिना मैदान बाहिर रहेका नेइमार दोस्रो हाफमा मैदान छिरेका हुन्। उनले आफू पूर्ण रूपमा फिट भएको जानकारी गराउँदै आकर्षक गोल गरी टिमलाई सुरूवाती अग्रता दिलाए।
फिलिप कोटिन्होले दिएको पासमा दुई जना क्रोएसियन डिफेन्डरदाई छक्याउँदै उनले आकर्षक गोल गरेका हुन्।
१-० ले अगाडि रहेको ब्राजिलका लागि इन्जुरी समयको अन्तिम मिनेटमा रोबर्टो फिर्मिनोले गोल गर्दै विश्वकपमा बलियो दाबेदारी प्रस्तुत गरे।
४५ मिनेट मैदानमा खेलेका नेइमार पहिले जस्तै खेल्न सक्ने भएका छन्। उनले यसबीचमा केही पोष्ट प्रहारसमेत गरेका थिए। केही बल पाससमेत दिएका थिए।
फिफा विश्वकप २०१८ मा छनोट हुने पहिलो टिम ब्राजिलले अब आगामी आइतबार अस्ट्रियासँग मैत्रीपूर्ण खेल खेल्नेछ। ब्राजिल विश्वकपमा समूह इमा छ। ब्राजिलले पहिलो खेल जुन १७ मा स्विटजरल्यान्डसँग खेल्नेछ।