मोरङको निर्वाचन क्षेत्र नम्बर ३ मा नेपाली चलचित्रकी अभिनेत्री तथा राष्ट्रिय प्रजातन्त्र पार्टीकी उम्मेदवार रेखा थापाले दुई हजार मत कटाएकी छन्।
आफ्ना प्रतिस्पर्धीहरूभन्दा निकै पछाडि रहेकी रेखाले पछिल्लो मत परिणाममा २०३४ मत ल्याएकी छन्। उनी यहाँ तेस्रो स्थानमा छिन्।
गणना सुरू भएदेखि नै अग्रस्थानमा रहँदै आएका नेपाली कांग्रेसका सुनिल शर्माले यहाँ ९१७७ मत ल्याएका छन् भने दोस्रो स्थानमा रहेका नेकपा एमालेका भानुभक्त ढकालले ५२८४ मत पाएका छन्। सुनिल शर्मा र भानुभक्त ढकालबीच ३८९३ मतको अन्तर छ।
शर्मा र ढकाल यहाँ दोस्रोचोटि एकअर्कासँग चुनावी प्रतिस्पर्धामा ओर्लिएका हुन्। २०७४ को निर्वाचनमा पनि सुनिल शर्मा र भानुभक्त ढकालबीच नै प्रतिस्पर्धा थियो। त्यति बेला ढकालले शर्मालाई हराएका थिए।
