दीपेन्द्र के खनाल निर्देशित फिल्म 'के घर के डेरा: घर नं २' को टिजर सार्वजनिक भएको छ।
शुक्रबार ओएसआर डिजिटल युट्युब च्यानलमार्फत फिल्मको टिजर सार्वजनिक गरिएको हो। सार्वजनिक टिजरमा आम नेपाली निम्न वर्गीय परिवारले भोग्ने समस्यालाई समेटिएको छ। आफ्नो दु:ख अरूलाई सुनाएर मन हलुंगो बनाएको दृश्य टिजरमा छ।
पारिवारिक प्रेम, वियोग र त्यसले दिने मानसिक यातना टिजरमा समेटिएको छ।
'के घर के डेरा: घर नं २' जेठ २ मा रिलिज हुँदैछ। फिल्ममा खगेन्द्र लामिछाने, निश्चल बस्नेत, उपासना सिंह ठकुरी, आर्यन सिग्देल, केकी अधिकारी, प्रकाश घिमिरे, सिर्जना नापित, संजोग रसाइली, रुविना घिमिरे, सुरज विष्टलगायत कलाकारको अभिनय छ।
फिल्म एप्पल इन्टरटेनमेन्ट, ए प्लस इन्टरटेनमेन्ट तथा नटराज क्रिएसनको प्रस्तुतिमा निर्माण भएको हो। फिल्मको कथा 'कर्णाली ब्लुज', 'एक्लो' र 'फिरफिरे' उपन्यासका लेखक बुद्धि सागरले लेखेका छन्। उनको यो पहिलो फिल्म हो।
कृष्णबहादुर थापाको फिल्ममा छायांकन रहेको छ। 'के घर के डेरा: घर नं २' को निर्मातामा नकिमउद्दिन, शरद श्रेष्ठ र किरण महर्जन छन्। कार्यकारी निर्माताको रूपमा युवराज कार्की छन्।
