सुविन भट्टराईको चर्चित उपन्यास 'समर लभ' मा आधारित रहेर निर्माण भएको फिल्म 'समर लभ' बाट नेपाली फिल्ममा डेब्यू गरेका अभिनेता आशिष पिया फिल्ममा कमब्याक गर्ने भएका छन्।
'समर लभ' रिलिजको ५ वर्षपछि उनी 'अमिगोस्' बाट नेपाली रजतपटमा कमब्याक गर्न लागेका हुन्। उनले अभिनय गर्ने लभस्टोरी फिल्म 'अमिगोस्' को छायांकन आगामी भदौबाट नेपाल र अष्ट्रेलियामा गरिनेछ।
यो फिल्मको लेखन तथा निर्देशन मार्केन्डे डिपविम बस्नेत (मार्कु) गर्नेछन्। उनी पनि करिब एक दशकपछि नेपाली फिल्मको लेखन तथा निर्देशनमा कमब्याक गर्दैछन्। उनले यसअघि 'सौर्य' र 'द्रव्य' को लेखन तथा निर्देशन गरेका थिए।
बिएस इन्टरनेसनल स्टुडियोको ब्यानरमा निर्माण हुने लभस्टोरी फिल्म 'अमिगोस' लाई विकास आचार्यले निर्माण गर्नेछन्। उनले पहिलो पटक फिल्म निर्माणमा हात हालेका हुन्। सुरेन्द्र रावल सह-निर्माता रहेको फिल्मको अष्ट्रेलियामा ७० प्रतिशत र नेपालमा ३० प्रतिशत छायांकन गरिनेछ।
हाल फिल्मका लागि २ मुख्य कलाकारको खोजी भइरहेको निर्माण टिमले जानकारी दिएको छ। केही दिनमा मुख्य भूमिकामा काम गर्ने आशिष बाहेकका एक अभिनेता र एक अभिनेत्रीको टुंगो लाग्ने निर्माण टिमले जानकारी दिएको छ।
