अशोक थापा मगरको निर्देशनमा फिल्म 'जलाकी' बन्ने भएको छ।
शुक्रबार फिल्मको टाइटल मोसन पोस्टर सार्वजनिक गर्दै निर्माण घोषणा गरिएको हो। पोखराको बिन्ध्याबासिनी मन्दिरमा शुभ मुहूर्त गरिएको फिल्मको छायांकन शुक्रबार आज बागलुङको कालिका भगवती मन्दिरमा भइरहेको छ।
त्रिकोणात्मक प्रेम कथामा आधारित फिल्ममा सोनाम तोप्देन, उपासना सिंह ठकुरी, अस्तित्व भट्टचन र आकृति राजभण्डारीको मुख्य भूमिका रहने छ। गायक सुशान्त केसीको चर्चित गीत बार्दलीबाट उदाएकी मोडल आकृति राजभण्डारीको 'जलाकी' डेब्यू फिल्म हो।
कसैको सम्झना र मायाको प्रतिकको रूपमा मानिने 'जलाकी' मगर समुदायको आस्थाको प्रतिक ढुंगाले चिनेको स्तम्भलाई बुझाउँछ। यो फिल्मको छायांकन तीन चरणमा निर्देशक अशोक थापा मगरले बताए। रूकुम, म्याग्दी, बाग्लुङ, पोखराका विभिन्न भुभाग र दक्षिण कोरियामा समेत छायांकन गरिने यो फिल्मले मगर र गुरूङ समुदायको संस्कृतिलाई झल्काउने छ।
एम मिडिया प्रालीको ब्यानरमा निर्माण हुन लागेको फिल्मका निर्मातामा ओम घर्तीमगर, वीर बहादुर लामा, चन्द्र बहादुर भट्टचन, बेताने मगर (बबिता राना) मान बहादुर धनाह मगर र सुस्मिता बुढाथोकी रहेका छन्। फिल्ममा माओत्से गुरुङ, बुद्धि तामाङ, संगीता थापा मगर, राजु रेग्मी मगर, खड्क बहादुर पुन (खबपु) लगायतका कलाकारको पनि अभिनय रहनेछ। अन्य केही कलाकारको छनोट कार्य भइरहेको निर्माण टिमले जानकारी दिएको छ।
फिल्मको शैलेन्द्र डी कार्कीको डिओपी, राजु रेग्मी मगर लाइन प्रोड्युुसर, महेश बराल मुख्य सहायक निर्देशक, एसडी योगी र सरित राईको संगीत, सुरेन्द्र राना र राम अविरल विष्टको गीत रचना रहनेछ।
