प्रकाश सपुतको निर्देशनमा बनेको फिल्म 'वसन्त' सेन्सर पास भएको छ।
सामाजिक कथामा बनेको यो फिल्मलाई केन्द्रीय चलचित्र जाँच समितिले युनिभर्सल प्रमाणपत्र दिएको छ। कुनै पनि दृश्य नकाटिकनै फिल्म सेन्सर पास भएको ‘वसन्त’ का पोजेक्ट हेड दिल शिरीषले जानकारी दिए।
योसँगै फिल्म सबै उमेर समुहका दर्शकले हेर्न पाउनेछन्।
यही शुक्रबारदेखि प्रदर्शनमा आउन लागेको फिल्मको हलहरूले अग्रिम टिकट बिक्री सुरू गरिसकेका छन्। मल्टिप्लेक्स हलहरूले यो फिल्मलाई उच्च शो दिएका छन्।
गीतलाई समेत फिल्मी शैलीमा निर्माण गर्दै आएका प्रकाशको 'वसन्त' निर्देशकका हिसाबले पहिलो फिल्म भएकाले चासोका साथ हेरिएको छ। फिल्मको सार्वजनिक ट्रेलर र गीतले पनि राम्रो हाइप बनाइरहेका छन्।
यो फिल्ममा प्रकाश सपुत र स्वस्तिमा खड्का शीर्ष भूमिकामा छन्। साथमा प्रभात पाल ठकुरी, श्री शिभान्सी, उर्मिला लाम्गादे, खड्ग बहादुर पुन (खबपु), अनुप बराल, कमलमणी नेपाल, प्रकाश घिमिरे, विशाल पहारी लगायतको अभिनय छ।
फिल्मको कथा र संगीत प्रकाश सपुत स्वयंको हो। निर्मातामा मोहन विश्वकर्मा र विन्दु बोहोरा छन् भने बिरेन्द्र नारायण श्रेष्ठ, अनुरोध भट्टराई र नाना थकाली कार्यकारी निर्माता हुन्।