प्रकाश सपुतको निर्देशनमा बनेको फिल्म 'वसन्त' को गीत 'हेर्दै आँखामा' सार्वजनिक गरिएको छ।
नेपाल र भारतको गोवामा खिचिएको गीतको भिडिओमा अभिनेता प्रकाश र अभिनेत्री स्वस्तिमा खड्कालाई रोमान्टिक अवतारमा फिचर्ड गरिएको छ।
यो गीतमा सुगम पोखरेल र समीक्षा अधिकारीको स्वर छ। शब्द तथा संगीत प्रकाश सपुतकै हो भने संगीत निर्माता योगेश काजी हुन्। आइतबार बेलुका सार्वजनिक भएको गीत केही घन्टामै युट्युब ट्रेन्डिङमा समेत उक्लिसकेको छ।
गीत सार्वजनिक गर्दै प्रकाशले मानिस जुनसुकै जात, धर्म अनि वर्गको भए पनि एक नै भएको सन्देश 'हेर्दै आँखामा' गीतले दिने बताए।
भिडिओमा फिल्मका मुख्य पात्र वसन्तले विभिन्न धर्म र संस्कार अनुसार विवाह गरेको देखाइएको छ। जसले फिल्मको कथा र त्यसको मर्मलाई चित्रण गर्ने प्रकाशको भनाइ छ।
सुशन प्रजापतिको छायांकन रहेको गीतमा केवीका खत्रीको कोरियोग्राफी र प्रवीन भट्टको सम्पादन छ।
फिल्म 'वसन्त' यही चैत्र २२ गते शुक्रबारबाट नेपाल र विदेशमा एकसाथ रिलिज हुने तयारीमा छ। फिल्ममा प्रकाश र स्वस्तिमासहित प्रभात पाल ठकुरी, श्री शिभान्सी, उर्मिला लाम्गादे, खड्ग बहादुर पुन (खबपु), अनुप बराल, कमलमणी नेपाल, प्रकाश घिमिरे, विशाल पहारी लगायतको अभिनय छ।
गलबन्दी प्रोडक्सनको प्रस्तुति रहेको फिल्मको निर्मातामा मोहन विश्वकर्मा र बिन्दु बोहोरा छन् भने कार्यकारी निर्मातामा अनुरोध भट्टराई, नाना थकाली र विरेन्द्र नारायण श्रेष्ठ छन्।
