अभिनेत्री स्वस्तिमा खड्का र मुकुन भुषाल अभिनीत फिल्म 'बुलबुल' एमएसएम एपमा रिलिज हुने भएको छ।
सन् २०१९ मा भ्यालेन्टाइन डे मै हलमा प्रदर्शनमा आएको फिल्म 'बुलबुल' एमएसएम एपमा भ्यालेन्टाइन डे कै दिन २०२५ को फेब्रुअरी १४ मा रिलिज हुने भएको हो। एमएसएम एपमा विश्वका धेरै देशबाट मोबाइल, गुगल, टीभी, एन्ड्रोइड, अमेजन फायर स्टिक टिभी, सामसुङ टीभी, एलजी टीभी, एप्पल टीभी, हिसेन्स टीभी, भिडिओ टीभी, रोकु टीभी एप र कम्प्युटरमा पनि उपलब्ध छ। यसैले हरेक वर्गका दर्शकले आफूले मनपर्ने फिल्म सजिलै हेर्न पाउँछन्।
फिल्मका निर्माता अविरल थापाले पहिले हलमा हेर्न नपाएका र नभ्याएका दर्शकले देशभित्र र विदेशबाट समेत बुलबुल हेर्न अत्याधिक माग गरेपछि पुनः प्रदर्शनमा ल्याउन लागेको बताए।
कहाँबाट कतिले फिल्म हेरे र कति आम्दानी भयो भन्ने सबै फिल्म निर्माता आफैँले पारदर्शी रूपमा हेर्न सकिने हुँदा फिल्म निर्माताका लागि र दर्शकको लागि पनि घरमै बसीबसी विभिन्न प्लेटफर्ममा आफनो समयअनुसार फिल्म हेर्न पाउनु आफैँ राम्रो भएको थापाले बताए।
स्वस्तिमा खड्काले यो फिल्ममा उत्कृष्ट अभिनय गरेबापत सार्क फिल्म फेस्टिभललगायत अन्य घरायसी फेस्टिभलहरूमा साथै राष्ट्रिय चलचित्र पुरस्कार प्राप्त गरेकी थिइन्।
निर्देशक विनोद पौडेलले पनि उत्कृष्ट निर्देशकको पुरस्कार हात पारेका थिए। यो फिल्मले नेपालको तर्फबाट ९२ औं अस्कर फिल्म अर्वाडमा पनि प्रतिनिधित्व गरेको थियो। संसारका कैयन अन्य फिल्म महोत्सवमा पनि छानिएको थियो।
फिल्ममा अभिनेता मुकुन भुषाल, लक्ष्मी बर्देवा, दीपक क्षेत्रीलगायतको पनि अभिनय रहेको छ। मुकुनले २०१९ मा यही फिल्मबाट आफ्नो फिचर फिल्ममा डेब्यू गरेका थिए।
