'नेपाल आदिवासी जनजाति चलचित्र महोत्सव २०२५' स्कटल्याण्डको राजधानी एडिनबर्गमा आयोजना हुने भएको छ।
आयोजक नेपाल स्कटल्याण्ड एशोसियसन स्कटल्याण्ड, नेपाल चलचित्रकर्मी महासंघ, प्रदेश १ र फिल्म कल्चर सोसाइटी अफ नेपालले महोत्सवको आयोजना गर्न लागेको हो। एशोसियसनलाई नेपालबाट आयोजनामा सहकार्य नेपालबाट फिल्म निर्देशक समाजले गर्नेछ। कार्यक्रमको सहजिकरण आदिवासी जनजाति फिल्म महासंघ प्रदेश १ ले गर्नेछ। एशोसियसनले मंगलबार एक कार्यक्रम गर्दै महोत्सव आगामी अगस्टमा आयोजना हुने घोषणा गरेको छ।
आदिवासी फिल्मको अन्तर्राष्ट्रिय बजार प्रवद्धनका लागि महोत्सव आयोजना हुन लागेको आदिवासी जनजाति फिल्म महासंघ, प्रदेश १ का अध्यक्ष ज्योतिराज राईले बताए। महोत्सवले आदिवासी जनजाति फिल्मको अन्तर्राष्ट्रिय बजार बिस्तार हुने र निर्माणमा समेत तिब्रता आउने राईको विश्वास छ। स्कटल्याण्डपछि अन्य विभिन्न मुलुकमा समेत महोत्सव क्रममा आयोजना गर्ने लक्ष्य संस्थाको रहेको राईले सुनाए।
कार्यक्रममा नेपाल स्कटल्याण्ड एशोसियसनका अध्यक्ष विजय डंगोल, हिमालयन सेन्टरका अध्यक्ष टीका लिम्बु, कलाकार सुवाष थापा, निर्माता सागर सुवेदी, नेपाल चलचित्र निर्देशक समाजका महासचिव तथा नेपाल फिल्मकर्मी महासंघ कोशी प्रदेशका अध्यक्ष अरुणकुमार प्रधान लगायतको सहभागीता थियो।
महोत्सवमा आदिवासीका खाना, पहिरन, कलासंस्कृतिकोे अलवा आदिवासी फिल्म प्रदर्शन समेत हुनेछ। प्रदर्शन भएका फिल्मका कलाकार र फिल्मलाई अवार्ड समेत प्रदान गरिनेछ। कार्यक्रममा विभिन्न अन्तक्रिया, सम्मान समेत आयोजना हुने महोत्सवमा थुप्रैको सहभागीता रहने महोत्सवका निर्देशक अरुण कुमार प्रधानले बताए।
अगस्टमा स्कटरल्याण्डको एडिनवर्गमा विश्वको चर्चित महोत्सव 'एडिनवर्ग महोत्सव' आयोजना हुँदैछ। सोही अवसर पारेर यो महोत्सव हुन लागेको हो। स्कटल्याण्डमा आदिवासी चलचित्र महोत्सव हुन लागेको पहिलो भएको आयोजक नेपाल स्कटल्याण्ड एशोसियसनका अध्यक्ष विजय डंगोलले बताए।
महोत्सवमा समावेश हुने फिल्मका विधा र अन्य जानकारी केही समयपछि दिने निर्देशक प्रधानले बताए।
